foto: stan.kz
«Bizdiń kók pasportymyzǵa elimizdiń tuǵyry sanalatyn basty qundylyqtardyń bári syıyp tur. Ony búkil álem zamanaýı ozyq memlekettiń qujaty retinde tanıdy. Qazaqstan azamattary ondaǵan memleketke vızasyz bara alady jáne bizdiń tabandy jumysymyzdyń arqasynda mundaı elderdiń qatary kóbeıip keledi. Qazir Qazaqstan Álem tólqujattary ındeksinde 66-orynda tur. Bul – jaman kórsetkish emes. Budan bólek, sońǵy jyldary Qazaqstan azamattyǵynan bas tartqan adamdardyń sany aıtarlyqtaı azaıdy. Osynyń bári elimizdiń turaqty damyp kele jatqanyn, bizdiń elge qyzyǵýshylyqtyń arta túskenin jáne memleketimizdiń halyqaralyq bedeli joǵary ekenin kórsetedi», dedi Prezıdent.
Memleket basshysynyń aıtýynsha, Assambleıa jastardyń ıdeologııalyq tárbıesin aıryqsha nazarda ustaıdy.
«Assambleıa etnosaralyq kommýnıkasııa ortalyqtaryn damytýmen jáne osyndaı jańa ortalyqtar ashýmen aınalysady. Sondaı-aq áleýmettik mańyzy bar jobalardy qoldap, eriktilerdi jáne jergilikti birlestikterdi yntalandyrýmen shuǵyldanady. Men Ulttyq quryltaıda qazir elge qaýip tóndirip turǵan bes keselge toqtaldym. Assambleıa nashaqorlyq, qumarpazdyq (lýdomanııa), turmystyq zorlyq-zombylyq, vandalızm jáne ysyrapshyldyq sııaqty áleýmettik keseldermen kúresý isinde mańyzdy ról atqarady. Qaýipsiz ómir súrý úshin osyndaı qaterli qubylystardan birjola arylýymyz kerek. Bul – ásirese, urpaqtyń bolashaǵy úshin aıryqsha mańyzdy. Biz balalar men jastardy barynsha qorǵap, durys tárbıeleýimiz qajet. Qoǵamdyq keselderdi túbirimen joıamyz desek, ortaq iske búkil el bolyp jumylǵan jón. Ultyna, dinine, áleýmettik jaǵdaıyna qaramastan, oǵan barlyǵy atsalysýy kerek», dedi el Prezıdenti.
«Uly ister shaǵyn áreketterden bastalady». Sol sııaqty kishigirim áreketter aýqymdy ózgeristerge jol ashady.
«Ár adamnyń oı-sanasy jáne minez-qulqy jaqsarsa, tutas qoǵam jaqsarady. Maqsat-muraty bıik bolsa, eldiń rýhy da bıik bolady. «Adal azamat» bolý asa mańyzdy. Bir sózben aıtsaq, keleńsiz úrdisterden jaı ǵana jırený jetkiliksiz. Ony joıýǵa da belsene atsalysý kerek», dedi Memleket basshysy.
