Foto: gov.kz
Halyqtar arasyndaǵy ajyramas yntymaq jibin jalǵap jatqan keremet kelbet – qaıyrymdylyq. Uly mekende urpaǵymen ósip-ónip otyrǵan ózge etnos ókilderi erler etigimen sý keshken tasqynǵa tosqaýyl isinde de bir ekendigin baıqatty. Bul týraly kúni keshe ótken Qazaqstan halqy Assambleıasynyń «Birlik. Jasampazdyq. О́rleý» atty HHHIII sessııasynda Memleket basshysy Qasym-Jomart Toqaev aıryqsha atap ótti.
«Tasqyn bastalǵannan beri Qazaqstan halqy Assambleıasy belsendi ári úılesimdi jumys istep jatyr. Oǵan búkil el kýá. Jurtqa jan-jaqty kómek berý úshin dereý Assambleıanyń respýblıkalyq jáne aımaqtyq shtabtary quryldy. «Júrekten júrekke» degen aýqymdy aksııa júrgizilip jatyr. ...Olar qaıyrymdylyq jáne gýmanıtarlyq kómek jınaýǵa jumyldy. Sondaı-aq jurtty qaterden habardar etýge jáne qaýipsiz jerge kóshirýge atsalysty. Munyń bári – ózara janashyr jáne tileýles bolýdyń aıqyn kórinisi», dedi Prezıdent.
Asylynda da Assambleıa óte aýqymdy qaıyrymdylyq sharalaryn der kezinde jáne jedel uıymdastyryp keledi. Judyryqtaı jumylyp atqarylǵan eńbektiń arqasynda kelgen nátıjeler týraly «Qazaqstandyq qoǵamdyq damý ınstıtýtynyń» sarapshysy Baýyrjan Serikbaev pikir bildirdi.
«Qaıyrymdylyq - ata-baba jolymen boıymyzǵa sińgen ulttyq qundylyqtarymyzdyń biri. Asarlatyp úı salý, úlken sharýany aǵaıyn-týyspen birlese kóterý, qıyndyq kelse ózara kómekke asyǵý - dástúrimizde bar asyl qasıet. Sý tasqynynyń aldyn alý, zardap shekken aımaqtarǵa kómek qolyn sozý isinde biz Qazaqstan halqynyń myzǵymas birliginiń kýási boldyq. Elimizdiń barlyq aımaǵynan jınalǵan gýmanıtarlyq kómek zardap shekken aımaqtarǵa tolassyz jiberilip jatyr. On myńdaǵan eriktiler aǵaıynǵa kómekke asyqty. Memleket shuǵyl túrde máseleni qolǵa alyp, 100 myńnan astam el azamaty qaýipsiz aımaqqa kóshirildi. Bul - el bolyp jumyla kótergen birligimiz ben yntymaǵymyzdyń, boıymyzǵa babalardan sińgen qaıyrymdylyq qasıetimizdiń kórinisi. Mundaı uıymshyldyq, qaıyrymdylyq syndy qasıetterimiz halqymyzdy biriktirip qana qoımaı, el múddesi jolynda ózara yntymaq tanytyp, eńbek etýge bastaıtyn qundylyǵymyz. Bul iste Assambleıanyń da atqaryp jatqan eńbegi orasan», dedi Baýyrjan Serikbaev.
Ult tutastyǵy tuǵyryn nyǵaıtý jolynda Assambleıa júıeli sharalar uıymdastyrýdy maqsat tutqan. Eldegi etnos ókilderi jekeleı sharalarmen birge, qazaq halqynyń ulttyq merekelerin de toılaýǵa yqylasty.
«Jyl saıyn biz Qazaqstan halyqtarynyń birligi kúni meıramyn atap ótemiz. Odan bólek Áz-Naýryzymyz da ortaq mereke retinde toılanatyn, barsha halqymyzben birlese atap ótetin meıramymyzǵa aınalyp keledi. QHA-nyń elimizdiń barsha óńirlerinde «Dostyq» úıleri nátıjeli, elge paıdaly baǵytta jumys istep jatyr. Bul halqymyzdy biriktiretin, bir múddege jumyldyratyn jaqsy úrdister», dedi «Qazaqstandyq qoǵamdyq damý ınstıtýtynyń» sarapshysy.
Aıta ketsek, Assambleıa músheleri «Qaıyrymdylyq kerýeni» jobasy arqyly muqtajdyń joǵyn túgendep, qoldaý kórsetý úrdisin qalyptastyrǵan. Keıingi kúrdeli kezeń - sý tasqyny saldaryn joıýda da Assambleıa atqaryp jatqan sharalardyń mańyzy zor.
«Sý tasqyny bastalǵaly beri zardap shekken aımaqtarǵa Qazaqstan halqy Assambleıasynyń bastamasymen 770 mıllıon teńgeniń gýmanıtarlyq kómegi jiberildi. Respýblıka boıynsha 12 myńnan asa QHA eriktileri aýyl-aýyldy aralap, halyqpen birge bolyp, kómek qolyn sozdy. Assambleıanyń respýblıkalyq, óńirlik shtabtary qurylyp, belsendi jumys istedi. Bul óte jaqsy úrdis. Elimizdiń bir ekenin kórsetetin, halqymyzdyń yntymaǵyn bildiretin mańyzdy sharalar. Otanymyz ósip-órkendeýi úshin barsha halqymyzdyń birligi men yntymaǵy asa mańyzdy. Elimizdiń birligi myǵym, halqymyzdyń yntymaǵy myqty bolsa, kez kelgen qıyndyqty eńserip ótemiz», dep túıindedi Baýyrjan Serikbaev.
