«Taza aýla. Taza ólke. Taza el!» ataýymen iske asyp jatqan aksııanyń úshinshi aptasy «Jasyl aımaq» degen ataýǵa ıe bolǵan. Bul aptada oblys ortalyǵynda turatyn jurtshylyq aǵash kóshetterin otyrǵyzýǵa bilek sybanyp kiristi. Ásirese janarynda ot oınaǵan jastardyń jumysty qushtarlyqpen atqaryp jatqanyn aıtpaı ketýge bolmas.
Taraz qalasynyń shetkeri tusyndaǵy «Qyzylabad» alabyndaǵy №11 aýmaqtyń turǵyndary men jastar tal egýden synǵa tústi. Jarysty uıymdastyrýshylar jastardy jigerlendirý maqsatynda qarjylaı syıaqy da qarastyrypty. Dodaǵa oblystyq jáne qalalyq jastar resýrstyq ortalyqtary, №11 aýmaqtyq okrýginiń turǵyndarynan quralǵan komandalar qatysyp, jalpy sany 1 200 qara aǵash ekti. Qatysýshylardyń kóshetti qanshalyqty sapaly ekkenin, jerdiń durys qazylýyn jeti adamnan quralǵan arnaıy komıssııa zerdelep, júldegerler qatarynan kóringen úzdikterdi anyqtady. Jarys qorytyndysynda Taraz qalalyq jastar resýrstyq ortalyǵy 1-oryn ıegeri atansa, «Qumshaǵal jastary» komandasy 2-orynǵa turaqtady. Al úzdik úshtikti «Áýlıeata» jastary komandasy túıindedi. Júldege ilikken ujymdar qarjylaı syıaqymen jáne arnaıy dıplommen marapattaldy.
Uıymdastyrýshylardyń aıtýynsha, «Taza Qazaqstan» ekologııalyq aksııasy aıasynda atqarylatyn jumys munymen toqtap qalmaıdy. Qala mańyn abattandyrý, kógaldandyrý jumystary aldaǵy ýaqytta da sátimen jalǵasyn taba bermek. Eń bastysy, týǵan jerdi kórkeıtýge degen erikti jastardyń erik-jigeri kóńil qýantady. Olar «Taza Qazaqstan» aksııasyn qoldaýǵa daıyn.
Taraz
