20-24 sáýir aralyǵynda qala ákimdigi qyzmetkerleri, oblystyq Ardagerler keńesiniń músheleri, jastar resýrsy ortalyǵynyń belsendileri, A.Baıtursynuly atyndaǵy óńirlik ýnıversıtettiń magıstranttary men oqytýshylary birigip, Jeńis saıabaǵyn tazartyp shyqty.
«Sáýir bastalǵaly beri merdiger mekemelerdiń qoly jetpegen jerlerge tazalyq jumystaryn júrgizip jatyrmyz. Qanshama saıabaq pen alleıany tazartyp, eskertkishterdi jýyp, súrtip, aınalasyn tyrmalap, sypyryp, tap-taza etip qoıdyq. Búgin, mine, Jeńis saıabaǵyna shyqtyq. Keıde kúnine 10-15 mashına qoqys shyǵaratyn kezderimiz bolady», deıdi Qostanaı qalalyq TKSh bóliminiń jetekshisi Denıs Petrýhno.
Memleket basshysy Qasym-Jomart Toqaevtyń bastamasymen qolǵa alynǵan ekologııalyq aksııa mamyrdyń 11-ine deıin jalǵasady. Tazalyq aksııasynyń bir ereksheligi ár kúngi senbiliktiń «Taza ólke», «Kıeli meken», «Jasyl aımaq», «О́negeli urpaq», «Móldir bulaq» degen sııaqty óziniń taqyryby bar. Mysaly, bir ǵana «Kıeli meken» taqyryby aıasynda óńirdegi júzdegen eskertkish pen kıeli nysandardyń ishi-syrty tazartylyp, aınalasy qoqystan arshyldy.
Sý tasqynynan keıin súreńsiz kúıge engen Tobyl ózeniniń jaǵasyn tazartý jumystary da kúndelikti júrip jatyr. Jınalǵan qoqysty tegin shyǵaryp berýdi kommýnaldyq qyzmetter óz moıyndaryna alǵan.
Oblystyq TKSh basqarmasynyń málimetinshe, óńirde kóp bolyp qoldaý tapqan ıgi is-sharaǵa oblystyń 20 aýdanynan 42 myń adam atsalysyp, 2 myń tonnaǵa jýyq qoqys shyǵarylǵan.
Qostanaı oblysy
