Munysy nesi?!

Jańa jyldy qarsy alǵan kúnniń ertesinde qysqy dema­lysqa shyqqan Áset nemeremdi qasyma ertip, saǵyndyrǵan súıikti Semeıime jónep ber­gen­min. Almatyda shańǵy tebýge Shymbulaqtaı asa qolaıly jer bola tura, bul joly Semeıdiń qaraǵaıly ormanyn jón kórgen edik. Aıtqandaı-aq, mundaǵy taza aýa, eldegi azdy-kópti ózgeris-jańalyqtar kóńildi kóterip, qııalymyzdy sharyqtatyp jibergen. Sondaı ásermen júrgende «Semeı» qonaqúıiniń qaq tóbesine soıdaqtatyp jazylǵan jazýǵa kózim túskende álgindegi kóńil-kúıim sap basylyp qalǵanyn qaıtersiz! О́ıtkeni, sonaý keńes kezinen san ondaǵan jyldar boıy «Semeı» dep atalatyn qonaq úıiniń tóbesine «Semıpalatınsk» degen jazý ornyǵyp alypty. Al sol qonaqúı qabyrǵasynyń ekinshi bir jaq shetindegi qazaqsha jáne aǵylshynsha «Semeı» dep jazylǵan jazý kózge tipten de qorash. Osy oraıda osydan bes-alty jyl buryn Elbasy Jarlyǵymen erke Ertis jaǵasyndaǵy ejelgi qala aty buǵan deıin qos­arlanyp kelgen ataýdan bir­jola qutylyp, Semeı atanǵany, soǵan baılanys­ty el gazeti «Egemenniń» betke jýyq materıaldar toptamasyn berip, alty alashqa jar salyp, súıinshi su­raǵany eske oralǵan. Sonda etegimizden keri tartqandardy óz basym kórgen de, estigen de emespin. Al endeshe, myna tirshiligimizge jol bolsyn! Bul menińshe syrtqy kúshterdiń áse­ri emes, ózimizdiń boıkúıez me­keme basshylarynyń kúıki tirligi, essiz áreketi! Atap aıtqanda, qala­daǵy kez kelgen nysandy zań­dyq turǵydan tirkep, soǵan ruqsat beretin memlekettik ádi­let basqarmasynyń nemqu­raı­dylyǵy. Soǵan áı deıtin áje, qoı deıtin qojanyń bolmaı otyrǵany qalaı! Qazaq deseń ózińe tıedi. Qa­shan osyndaı boıkúıezdikten ary­lamyz ózi! Dáýlet SEISENULY, Semeı qalasynyń qurmetti azamaty. ALMATY.