Kompozıtor Mels О́zbekov konservatorııada oqyp júrgen kezinde Aıymzada atty qyzǵa ǵashyq bolady. Qos júrek birin-biri túsinip, mahabbattyń sharabyna mas bolyp júrgeninde, jazǵy kanıkýl da kelip qalady. Ekeýi qımaı qoshtasyp, jańa oqý jylynda kezdesýge ýaǵdalasypty. Demalys aıaqtalysymen, Mels Almatyǵa qaraı qustaı ushady. Izdegeni – Aıymzada. Oqý ornyna barsa, áli kelmegen eken. Ne isterin bilmeı, syrtta turǵanynda muny tanıtyn kýrstas qyzdardyń biri sýyq habar jetkizedi. Aıymzada kanıkýl kezinde ózenge shomylyp júrip, sýǵa ketip qaıtys bolǵan eken. Muny estigen Melstiń jaı-kúıi aıtpasa da túsinikti. Kól basyna baryp, muńaıyp otyryp, áýennen tynshý suraıdy. Sezimge toly «Kelshi, aıym» áni osylaı dúnıege kelgen eken.
«Nurıkamal»
Bul – kompozıtor Turdyqylysh Iztaı men onyń jary, aqyn Hanbıbi Esenqaranyń birge jazǵan shyǵarmasy. Alaıda týyndy ekeýiniń ortaq sezimi týraly emes.
T. Iztaı tabıǵat aıasyndaǵy bir otyrysta Nurıkamal degen sulý qyzǵa ǵashyq bolady. Sol keshte boıjetkendi bıge de shaqyrǵan. Biraq Nurıkamal bas tartypty. Sazger túnimen pıanıno oınap, sezimin ánge qosýǵa tyrysady. Muny sezgen aqynnyń jary ánniń sózin jazyp, «Aıtqyń kelgeni osy ma edi?» dep óleńdi joldasyna ózi aparyp bergen. Aqyn Hanbıbi Esenqaraqyzy esteliginde: «Ol boıjetkenge ǵashyq bolmaý múmkin emes edi. Bul ándi Estaıdyń Qorlany sııaqty baǵaladym», deıdi.
«Jas jubaılar»
«Senderge árdaıym oryn bar, Aq otaý tórine qonyńdar», degen ıgi tilekter aıtylatyn bul ánniń tarıhy bólek.
Sazger Bekjigit Serdáli stýdent shaǵynda Qultóleý dosynyń úılený toıyna poıyzben jolǵa shyǵady. Toı ótetin mekenge jaqyndaǵan saıyn jas jubaılarǵa qandaı syı tartatynyn ýaıymdaı bastaıdy. О́ıtkeni otaý quryp jatqan Qultóleý de, Raıhan da – sazgerdiń kýrstasy. Sondyqtan Bekjigit erekshe syılyq jasaý kerek dep oılaıdy. Bir kezde jol boıy dastarqanǵa aınalǵan «Lenınshil jastaǵy» eki shýmaq óleńge kózi túsedi. «Gazet betindegi álgi eki shýmaqty áýenge salyp, aıtyp kórip edim, áp-ádemi án shyǵa keldi. Sosyn «Jas jubaılar» dep ataý tańdym», deıdi sazger. Al ánniń sózin jazǵan О́tegen Oralbaevpen sazger tek eki jyl ótken soń, 1986 jyly tanysqan eken.
