Temirjol salasynyń esep-qısap jaǵynda júretin Togýs óz ortasyna syıly maman boldy. Biraq jumystyń da jaıy kún sanap kete bastaǵan edi. Eki oıly bolyp júrgen kúnderdiń birinde qala irgesindegi «Amangeldi» keńsharyna mal qorasyn daıyndaıtyn jumys kúshi kerek degen habar qulaǵyna tıgen. Aqshasy qomaqty bolǵanymen, kesimdi merzimde aıaqtaı alatynyna senimsiz jurttyń kóbi táýekelge bel baılaı qoımasa kerek. Muny estigen Togýs bir sát te kidirmedi, qalanyń ózi turatyn Shanhaı bóligindegi tanystarynan brıgada jasaqtap, jumysty bastap ketti. Qazaqta «Myń ónerdiń anasy – muqtajdyq» degen bar ǵoı. Alty balanyń qamyn oılaǵan kelinshektiń talaby ońǵarylyp, sodan bergi 40 jylda osy salanyń nanyn jep keledi.
«Toqsanynshy jyldary týystarymyzdyń kóbi Sheshenstanǵa kóshti. Meni de talaı úgittegen. Biraq týǵan jerimnen, aǵaıyndaı syılasqan kórshilerimnen irge ajyratqym kelmedi. Osy topyraqqa jer aýyp kelgen áke-sheshemdi bótensimegen, «ultyń bólek» dep ózimdi syrtqa teppegen qazaqtaı baýyrmal jurtty basqa eshqaıdan taba almaıtynymdy sezdim», deıdi Togýs Hamıdqyzy.
Talaby tabysqa aınalǵanyn kórgen soń, balalaryn da osy salaǵa beıimdedi. Qazir sol soqpaqqa nemereler de túsip, saladaǵy belgili mamanǵa aınalyp otyr. Qurylysshylar brıgadasynyń jumyssyz qalǵan kezi joq. О́zge oblystarǵa da shyǵyp, tapsyrystar oryndaıdy. Qyzylordadaǵy qurylys kompanııalary salyp jatqan úılerin árleýge kelgende Togýs Hamıdqyzyn izdeıdi. Qaladaǵy mektepter men áleýmettik nysandardyń denin jóndep shyqqan osy brıgada. Qazir oblystyq júıke aýrýlary aýrýhanasy ǵımaratynyń syrtyn árlep jatyr.
Osy salaǵa kelgeli baıqaǵany – kásipte talaptan bólek obal-saýapty da umytpaý kerek. Mysaly, qazir jóndeýden ótken kóp ǵımarattyń syrty alty aı aınalmaı jatyp alaǵattanyp túsip qalady. Sondaı jaýapsyz jumystyń kesirinen búkil qurylysshylarǵa syn aıtylatyn kez de az emes. Árleý materıaldarynyń quramyn saqtamasań, sylaǵan tusyń shańytyp turady. Jańbyr sýynan-aq sypyrylyp qalady. Astynan arnaıy eritindi jaqpasań, sylaq qabyrǵaǵa juqpaıtynyn qurylystyń álippesin ashqan kez kelgen adam biledi. Biraq az shyǵynmen kóp paıda tapsam degen ashkózdik basym bolyp tur.
«Memleket basshysynyń «Ádiletti Qazaqstanda eńbek adamyna erekshe qurmet kórsetilýge tıis. Ásirese ustaz, dáriger, tártip saqshysy, qutqarýshy, jumysshy, sharýa sııaqty mamandardyń mártebesin odan ári arttyra túsýimiz qajet. Olar elimizdegi eń syıly azamattarǵa aınalýy kerek. Osy kásip ıeleri tıisti qurmet pen syıǵa ıe bolǵanda ǵana qoǵamymyz shynymen jańardy dep aıta alamyz», degen sózi bizdiń qoǵamdaǵy mańyzdy máselege dál berilgen baǵa boldy.
Shynymen biz belýardan beınet keship, osy qoǵamnyń baılyǵyn eselep júrgen jandardy baǵalaýdy umytyp kettik. Mysaly, qazir damyǵan memleketterdiń kóbinde qara jumys isteıtin adam joq. О́ndiristegi jumysty jeńildetý úshin túrli tehnologııa oılap tapqan talaı el eginniń aramshóbin otap, malynyń jem-sýyn berýge qyrýar aqshaǵa syrttan adam jaldap otyr. Tabys izdegen qanshama jastarymyz sonda júr. Olardyń jaǵdaıyn jasap, ózimizde qaldyrmasaq, bolashaqta biz de jańaǵy memleketterdiń kebin kıemiz», deıdi kásipker.
Sheshenstandaǵy baýyrlary san márte shaqyrǵanymen de týǵan topyraǵyn qımady. Qyzdaryn qazaqqa uzatyp, baýyrmal jurtpen baılanysyn bekite tústi. Búginde qurylysshylar áýletinde 50-ge jýyq jan Togýs Hamıdqyzynyń jolyn qýypty.
Osydan 40 jyl buryn nartáýekelmen bastalǵan talapty tirlik búginde tabysty arnaǵa aınalyp, el damýyna úles qosyp keledi.
QYZYLORDA
