Foto: parlam.kz
Májilismen el arasynda kóp júretinin, óńirlerdi jıi aralaıtynyn alǵa tartyp, qoǵamda qorshaǵan ortany taza ustaý, qoqysty arnaıy orynǵa tastaý mádenıeti áli de qalyptaspaı otyrǵanyn aıtty.
«Qoǵamda áli de azamattarymyzdyń qaldyqtardy arnaıy qoqys tastaıtyn oryndarǵa salý mádenıeti qalyptaspaı otyrǵany jasyryn emes. Mysaly, plastık, áınek jáne polıetılen paketterdiń shirýi 1000 jylǵa deıin sozylady. Munyń Jer Anamyzǵa, adamzat balasyna, keler urpaqqa tıgizer zalaly zor», dedi Dáýlet Muqaev.
Depýtat damyǵan elderdegideı azamattardy aınalany taza ustaýǵa daǵdylandyrý, erikti túrde tazalyq jumystaryna jumyldyrý úshin aptanyń bir kúnin turaqty tazalyq kúni dep bekitýdi usyndy.
«Mysaly, aptanyń taǵy bir kúnin, naqtylap aıtsaq, ár beısenbini «Taza beısenbi» atty shynaıy halyqtyq sharaǵa aınaldyraıyq. Adamdardy májbúrlep emes, al kerisinshe óz yqylasymen, turǵan jerine degen janashyrlyqpen atsalysýyna jaǵdaı jasaıyq. Biz sol kezde ǵana kún-tún demeı, kúnniń ystyq-sýyǵyna qaramaı kósheni tazalap júrgen ata-apalarymyzdyń eńbegin baǵalaýdy úırenemiz», dedi májilismen.
Dáýlet Muqaev bul sharany júzege asyrý isine áleýmettik jelidegi mıllıondaǵan oqyrmany bar tanymal tulǵalardy, qoǵam belsendilerin, el turǵyndaryn ún qosýǵa shaqyrdy.
