foto: realkz.com
Aqynnyń jazýynsha, Aqmola oblysy, Zerendi aýdandyq sotynyń sýdıasy Aıda Kárimova tóraǵalyq etken sot prosesi jábirlenýshi taraptyń talabyn oń nátıjege sheshti.
«Elikti parktiń» ıesi sottalǵan joq. Onyń jıeni sottaldy. Sebebi, sol ýaqytta onyń bıznesi ýaqytsha sol jıeniniń atyna jazylǵan eken. Sot Álıhan syrǵanaǵan kúni de, odan bir apta keıin zardap shekken Dınara Mýksýlova men Birimjanovalar syrǵanaǵan ýaqytta da eshqandaı qaýipsizdik erejeleri saqtalmaǵanyn dáleldep, sottalýshyǵa qaýipsizdigi eń tómen kolonııaǵa tórt jylǵa bas bostandyǵynan aıyrýǵa úkim shyǵardy», dep jazdy S.Dúısenǵazy.
Aqynnyń aıtýynsha, oqıǵa bolǵan kúni sottalýshy tarap zardap shekken ulyn uıymdasqan túrde bir jarym saǵat boıy taýda tyǵyp ustaǵan. Biraq jábirlenýshi tarap buny sotta dáleldeı almaǵan.
«Biz olardyń uıymdasqan túrde balamyzdy taýda bir jarym saǵat tyǵyp tastaǵanyn dáleldeı almadyq. Sebebi, taýda balamnyń jatqanyn kórgen kýágerlerdiń sózderi ártúrli shyqty. Kóbi bir-birin tanıtyn adamdar ǵoı. Kamera bolmaǵan soń dáleldeý qıyn eken. Onyń ústine sottalýshy taraptyń jaldap alǵan eki advokaty da ákki, zań salasynan bilimderi tereń jigitter eken. Esh dálelderi joq bolsa da ár sotta «búırekten sıraq shyǵaryp-aq» baqty. Sot moraldyq shyǵynymyzdy ishinara qanaǵattandyrǵanymen, materıaldyq shyǵynymyzdy qanaǵattandyrmady. Onyń barlyǵyna chek kerek eken. О́zimiz azan-qazan bolyp jatqanda kim chek jınap júredi? Adam óliminiń ózi dálel emes pe? Bizdiń zańdarymyzdyń da qyzyq jeri kóp ekenine kóz jetti. Endi on bes kúnniń ishinde eki tarapqa da appelıasııalyq sotqa berýge múmkindik bar», dep jazdy aqyn.
Aıtyskerdiń aıtýynsha, talaı bala osy shańǵy bazasynda qaıtys bolsa da, isti jyly jaýyp qoıa bergen, tek ulynyń isi ǵana sotqa jetken.
«Dál meniń Álıhanym sııaqty talaı bala osyndaı shańǵy bazalarynda qaıtys bolǵan. Sot bitkenshe barlyǵynyń amanaty moınymda júrgendeı kúı keshtim. Solardyń arasynda Álıhannyń isi ǵana sotqa deıin jetti. Oǵan bizdi qoldaǵan qalyń qazaǵymnyń úlesi bar dep oılaımyn», dedi aıtysker.
Eske salaıyq, 2023 jyldyń 2 qańtarynda Kókshetaý mańyndaǵy «Elikti park» taý-shańǵy bazasynda aqyn Serikzat Dúısenǵazynyń 16 jastaǵy uly Álıhan aǵashqa soǵylyp, kóz jumǵan edi. Aǵashtyń túbinde jatqan jasóspirimdi syrǵanap júrgen demalýshylar baıqap, habar jetkizgen edi.
