Jumys berýshiler men bitirýshi túlekter arasynda erkin dıalog qalyptastyrý – ýnıversıtette ótetin dástúrli sharanyń negizgi maqsaty. Eńbek naryǵyna saraptama jasaý arqyly, zaman talabyna saı maman daıarlaýdy ustanyp otyrǵan ýnıversıtet túlekteriniń búginde 95 paıyzy jumyspen qamtylyp, óz salasynda jemisti eńbek etip júr.
Jármeńkede ýnıversıtettiń akademııalyq qyzmet jónindegi prorektory Baný Narbekova jumys berýshilerge alǵysyn bildirip, túlekterdi jumyspen qamtýǵa arnalǵan jobalar týraly baıandady. Sharada Almaty qalasy, Almaty oblysymen qatar respýblıkanyń shalǵaı aımaqtarynan kelgen jumys berýshiler de qatysyp, óz mekemelerin tanystyrdy.
Akademııalyq máseleler jónindegi departament dırektory Haırýlla Janbekov jumys berýshilerge ýnıversıtet jaıynda jáne túlekterge qatysty birqatar mańyzdy derekterdi aıtyp berdi.
Jármeńkege bul joly 135-ten astam mekeme qatysty. Olardyń qatarynda orta bilim, mektepke deıingi bilim, jekemenshik bilim berý uıymdary, óndiristik jáne satýmen aınalysatyn kompanııalar bar. Is-sharaǵa qatysqan jumys berýshiler tarapynan 579 bos jumys orny usynyldy. Buǵan qosa yntymaqtastyq baılanystar aıasynda Abaı ýnıversıtetiniń bitirýshi túlekterine respýblıkanyń túkpir-túkpirinen 1211 bos jumys oryndarynan suranys hat túsken bolatyn. Jármeńkege kelgen mekemeler túlektermen pikirlesip, suraqtarǵa jaýap berdi.
