Qońyr kúzde Astana qalasynda ótetin V Dúnıejúzilik kóshpeliler oıyndaryna daıyndyq jan-jaqty pysyqtalyp jatyr. Sondaı is-sharanyń biri Almatydaǵy Qazaq ulttyq agrarlyq zertteý ýnıversıtetinde ótip, «Qazaqstandaǵy at sporty men ulttyq jylqy sharýashylyǵynyń qazirgi jaǵdaıy men damý perspektıvalary» dóńgelek ústel ústinde talqylandy.
Jıynǵa Ulttyq Ǵylym akademııasynyń prezıdenti, Qazaq ulttyq agrarlyq zertteý ýnıversıtetiniń rektory Aqylbek Kúrishbaev, Ulttyq sport qaýymdastyǵynyń prezıdenti Islambek Saljanov, Májilis depýtaty Amanjol Áltaı, sondaı-aq Týrızm jáne sport mınıstrliginiń, Aýyl sharýashylyǵy mınıstrliginiń, ǵylymı qoǵamdastyqtyń, sport klýbtarynyń, Ulttyq sport qaýymdastyǵynyń ókilderi jáne onyń quramyna kiretin federasııalardyń basshylary men atbegileri qatysty.
Elimizde sporttyq jylqy sharýashylyǵyn damytý, at sporty men ulttyq sport túrlerinen mamandar daıarlaý máseleleri talqylanyp, dóńgelek ústelge jınalǵan qaýym óz oıyn ortaǵa saldy. Ulttyq sport qaýymdastyǵynyń prezıdenti I.Saljanov birneshe federasııaǵa bólinip, jumysyn órbitip otyrǵan ulttyq sport túrlerin retteý máselelerine jeke-jeke toqtalyp, aýqymdy sharýa atqarylýǵa tıis ekenin basa aıtty. Qazaqstanda osyǵan deıin bul salany retteıtin birde-bir zań qabyldanbaǵandyqtan da sharýanyń júıeli júrgizilýine qolbaılaý bolatynyn jetkizdi.
«2022 jyly Ulttyq sport qaýymdastyǵyn basqarý maǵan júkteldi. Eki jyldan beri eńserip kele jatqan negizgi sharýamyzdyń biri – osy ulttyq sport týraly zań jobasyn ázirleý. Sonyń negizinde Parlament Májilisiniń depýtattarymen birlesip ázirlenetin zańda etnosportty damytýdyń aspektileri qamtylady», dedi I.Saljanov.
Memleket basshysynyń tapsyrmasy boıynsha Ulttyq sportty damytýdyń 2024-2029 jyldarǵa arnalǵan tujyrymdamasynyń jobasyn ázirleý de osy uıymǵa júktelip otyr. Elimizde ulttyq sport túrlerin damytý máseleleri jáne olardy sheshý joldary jan-jaqty qamtylyp, iske asyrylatyn jospary men nysanaly ındıkatorlary usynylady.
Dóńgelek ústelge jınalǵandar Qazaqstandaǵy jylqy zaýyttarynyń qazirgi jaı-kúıin, ondaǵy at sporty ındýstrııasyn damytýdyń halyqaralyq talapqa saı kelmeıtinin, ınfraqurylymdy aldymen qolǵa alý qajettigin eskertti. Sonymen qatar ulttyq oıyndarǵa beıimdelgen jylqylardyń sanyn kóbeıtpeıinshe, teńge ilý, kókpar, báıge, aýdaryspaq, jamby atý syndy at ústinde ótetin bekzada ónerdi damytý múmkin emes. Taǵy bir kiltıpan, sport ǵylymy men sporttyq medısınany damytý aqsap tur. Buǵan da basa kóńil bólip, nazar aýdarmasa, qolymyzdy mezgilinen kesh sermep qalamyz desti jıylǵan qaýym.
Elordada ótetin Dúnıejúzilik kóshpeliler oıyndarynyń qarsańynda Ulttyq sport qaýymdastyǵynyń bastamasymen Ulttyq sport joǵary mektebi quryldy. Almatydaǵy Sport jáne týrızm akademııasyna alǵash ret «at sporty túrleriniń jattyqtyrýshysy» mamandyǵyna jáne Qazaq ulttyq agrarlyq zertteý ýnıversıtetiniń bazasynda «sporttyq jylqy sharýashylyǵyndaǵy veterınar» mamandyǵy boıynsha talapkerlerdi qabyldaý bastalmaq.
О́z kezeginde Aqylbek Kúrishbaev Qazaqstanda ulttyq sport túrleri qarqyndy damyp kele jatqanyna, atty kútý, baptaý ózindik bir ǵylym ekenine toqtaldy.
«At sportynda jylqynyń kúıin baqylaý, rasıonaldy azyqtandyrylýyn qadaǵalaý, kútip-baptaýdy durys uıymdastyrý jáne ınfeksııalyq aýrýlarǵa qarsy ýaqtyly ekpe jasaý – tikeleı veterınarlardyń mindeti. Tól ónerdi álemdik deńgeıge shyǵarý baǵytynda kásibı mamandardy, sonyń ishinde jylqy baptaý jónindegi veterınarlardy daıarlaýdyń jetispeýi kúrdeli máselelerdiń biri bolyp otyr. Osyǵan oraı, 2024-2025 oqý jylynan bastap, bizdiń ýnıversıtette «At sportynyń veterınarııasy» mamandaryn daıarlaý elimizde birinshi ret júzege asyrylmaq», dedi ýnıversıtet rektory.
Ulttyq sport qaýymdastyǵynyń qoldaý kómegimen Senat depýtattary qostanaılyq jylqy tuqymyn saqtaý jáne ósimin molaıtý jónindegi zańǵa bastamashy boldy. Bul búginde Májiliste qaralý satysynda tur.
Dóńgelek ústelge jınalǵan mamandar Qazaq ulttyq agrarlyq zertteý ýnıversıteti bazasynda sporttyq jylqylardy baqylaý baǵytynda dopıng zerthanasyn ashý, mal sharýashylyǵynyń ózekti salasy retinde sporttyq jylqy basyn kóbeıtýge qatysty usynystary qabyldanyp, zań jobasyna qosyldy.
