Erlikke taǵzym – urpaqqa taǵylym

«Jobanyń basty maqsaty – árbir batyrdyń, árbir jaýyn­gerdiń tarıhta máńgi tań­balanýyn, laıyqty tanylýyn qamtamasyz etý», dep atap ótti mınıstr Aıda Balaeva. Saıt domeni – batyrlargatagzym.kz.

Memleket basshysy Qasym-Jomart Toqaevtyń Ulttyq quryltaıdyń úshinshi otyrysynda: «Ekinshi dúnıejúzilik soǵys eski shejirege aınalǵan saıyn tarıhı jáne áskerı taqyryptaǵy alyp-qashpa ańyz áńgimeler kóbeıe tústi. Qazaqstan árqashan tarıhı shyndyqtyń jáne adamzat jylnamasyndaǵy eń qandy qasap týraly shynaıy kózqarastyń saqtalǵanyn qalaıdy. О́tkendi saralap, oǵan shynaıy baǵa berýdiń mańyzy zor. Sol úshin muraǵat materıaldaryn muqııat zertteý qajet. Surapyl soǵys kezindegi aǵa býynnyń óshpes erligi men eren eńbegin urpaq jadynda jańǵyrtý óte mańyzdy. Mem­leket bul baǵyttaǵy jumysty jalǵastyra beredi», dedi.

Saıtta júktelgen, túrli senimdi aqparat kózderinen jı­naq­talǵan muraǵat materıal­dary otandastarymyzdyń soǵys jyldaryndaǵy erlik isterin, eren eńbegin pash etedi. Bul joba – qaıtpas, qaısar jaýynger ata, ákelerimizdiń asyl rýhtaryna qoıylǵan máńgi eskertkish. Qanatqaqty joba 2023 jyly jarııa etilgen sátten azamattyq qoǵam men volonterler tarapynan qyzyǵýshylyq, qulshynys týdyrdy. Sóıtip, joba arnasy keńeıe kelip, endi mine, derekter tolyqqandy portalǵa júıelenip otyr.

«Búginde portalda 100 myńnan astam qazaqstandyq ardager týraly aqparat bar, biz soǵystyń 80 jyldyǵyna qaraı portal barlyq jaýynger týraly málimetterdi biriktiredi dep senemiz», deıdi A.Balaeva.

Mınıstrlik el turǵyndaryn ardager­ler týraly ózderinde bar máli­metterdi usyný arqy­ly jobaǵa úles qosýǵa shaqyra­dy. Ár adam jeke otbasy muraǵa­tyn­­da saqtalǵan, fotosýretter, qu­­jat­tar, maıdannan kelgen hat­­tar jáne basqa da materıaldar úl­gi­sindegi túrli derekterdi, qu­jat­tardy kóshirýge, júkteýge berý arqyly jobaǵa kómektese alady.

«Portal Mádenıet jáne aqparat mınıstrliginiń, mem­lekettik muraǵattardyń, Qor­ǵanys mınıstrliginiń, volon­terlerdiń jáne azamattyq qoǵamnyń birlesken jumysynyń nátıjesi», dedi A.Balaeva.

Biregeı saıt – surapyl soǵys­ta janqııarlyqpen erlik ja­saǵan, eli úshin janyn qur­ban etken babalar rýhy­na taǵzym etýdiń, qııan-keski urys­tan aman kelgen ata-ájeler­di qurmetteýdiń taǵy bir taǵylymdy úlgisi. Ardagerler bizge tek jaýyngerlik erligimen emes, ómirlik ónegesimen de qymbat. Sol turǵyda dostyq, erlik jáne baýyrlastyq tárizdi ulaǵatty uǵymdarmen tyǵyz baılanysty Jeńis sarbazdaryn jan-jaqty ulyqtaı berý – qasıetti paryz. Ot pen oqtyń ortasynda júrip, erliktiń eren úlgisin kórsetken qazynaly qarttarymyz qandaı qurmet-qoshemetke de laıyq.