Kópshilikti kól-kósir qýanyshqa bólegen jańa páterlerdiń jalpy quny – 162 mln 700 myń teńge. Jańa páterler «Asar Astana» qoǵamdyq qorynyń qarjysyna alyndy. Áli de elý otbasy jergilikti atqarýshy organdardyń kómegimen ózderine laıyqty páter izdestirip jatyr.
Páter birinshi kezekte baspanalary múldem jaramsyz bolyp qalǵan turǵyndarǵa berildi. 334 otbasyna 123 mln teńge bir jolǵy kómek tólenipti. Sý tasqynynan zardap shekken ár otbasyna keltirilgen zalaldy esepteý jalǵasa beredi.
«Qalada salynyp jatqan 100 páterli eki kópqabatty úıdiń qurylysyn aıaqtap, taǵy bir dál osyndaı turǵyn úıdiń qurylysyn bastaımyz. Memleket basshysy Qasym-Jomart Toqaevtyń tapsyrmasymen uzaq ýaqyttan beri páter kezeginde turǵan kópbalaly otbasylardy, múgedektigi bar jáne áleýmettik jaǵynan az qamtylǵan otbasylarǵa jatatyn adamdardy turǵyn úımen qamtamasyz etemiz. Aldaǵy ýaqytta jyl saıyn sý tasqynynyń zardabyn shekpes úshin Jabaı ózeniniń arnasyn keńeıtip, túbin tazalap, jaǵalaýyn bıiktetý jumystaryn júrgizemiz», deıdi oblys ákimi Marat Ahmetjanov.
Jańa páterlerdiń kiltin alǵan atbasarlyqtar el Prezıdentine, eriktilerge jáne janashyr jandarǵa shynaıy alǵystaryn jetkizdi. Jańa salynyp jatqan eki úı kóktemgi sý tasqyny qaýpi únemi tónip turatyn qyzyl aımaqtaǵy turǵyndardy kóshirýge arnalǵan. 2021 jyly qurylys materıaldarynyń baǵasy ósip ketýine baılanysty aıaqtalmaı qalǵan. Endi aldaǵy jospar ońynan ońǵarylsa, 200 otbasy qonys toıyn toılamaq. Qazir ishki árleý jumystary júrgizilip jatyr.
«Aýdanda sý basqan 250-ge jýyq úı tolyq tekserilip, saraptama berildi. Zardap shekken turǵyndarǵa 100 aılyq eseptik kórsetkish kóleminde alǵashqy kómek kórsetildi. Komıssııa qorytyndysy boıynsha 40 mln 136 myń teńge shyǵyn kelgeni anyqtaldy, 77 úı apatty jaǵdaıda dep tanylyp, 173 úıge jóndeý jumystary júrgizilmek», deıdi aýdan ákimi Amanbek Qaljanov.
Sý tasqyny kezinde 6 eldi meken aýdan ortalyǵymen qatynasa almaı qalǵan. Eki aptanyń ishinde jóndeý jumystary júrgizilip, barlyq eldi mekenderdiń arasynda qatynas ornatylǵan. Turǵyn úılermen qatar №1 jalpy bilim beretin mektep pen «Esil» saýyqtyrý lageri de zardap shekken eken. Zalal kólemi – 236 mln teńge. Qazir jóndeý jumystary bastalyp ketken. Jańa oqý jylyna deıin muqııat jóndeýden ótkizilmek.
El eleńdegen qaýip-qater de seıildi. Jergilikti turǵyndar atqarýshy organdardyń ábjil kómegine razy.
«Sáýirdiń ony kúni bizge úlken kólemde tasqyn sýdyń kele jatqany týraly habarlandy. Úı jıhazdaryn joǵary kóterip qoıdyq ta, qaýipsiz jerdi panaladyq. Bir áttegen-aıy, uzaq jyl baspanamyz bolǵan úıimizdiń qabyrǵalary qulap jatyr. О́zim kópbalaly ana bolǵandyqtan, tórt bólmeli úı tıe me dep úmittenip otyrmyn. Aýyl ákimdiginiń mamandary qajetti qujattardy rásimdeýge kómektesti. Janashyr jandarǵa myń alǵys», deıdi Borısovka aýlynyń turǵyny Natalıa Zaıka.
Qyzyl sý júrgen kezde úreı bulty torlaǵan Atbasardyń aspany shaıdaı ashylyp keledi. Bul – eń aldymen, berekeli istiń nátıjesi.
Aqmola oblysy,
Atbasar aýdany
