Foto: t.me/qr_tjm
Bir kúnde baspanasynan, dúnıe-múlkinen aıyrylǵan turǵyndar janaıqaıyn jergilikti atqarýshy organǵa jetkizý úshin osyndaı qadamǵa bardy.
Ákimdik ǵımaratynyń aldyndaǵy alańǵa jınalǵan turǵyndardyń talabyn aldymen Jylyoı aýdanynyń ákimi Jumabek Qarajanov tyńdady. Keıin oblys ákiminiń orynbasary Jasulan Bısembıev Qulsaryǵa arnaıy bardy. Bir kúnnen soń oblys ákimi Serik Shápkenov qulsarylyq turǵyndarmen kezdesti.
Oblys ákimi shyryldaǵan turǵyndarǵa keltirilgen shyǵyndy tóleýdegi erekshelikterdi túsindirdi. Ákimniń aıtýyna qaraǵanda, apatty dep tanylǵan, jóndeý júrgizýge sheshim qabyldanǵan úıler úshin ótemaqy beriledi. Biraq ótemaqy da, zalal shyǵyny da naryq baǵasyna sáıkes tólenedi.
«Barlyq zardap shegýshige birdeı somada ótemaqy berý múmkin emes. Baǵalaý kezinde kóptegen parametr, atap aıtqanda, qurylys materıaldarynyń sapasynan bastap úıdegi esiktiń sanyna deıin eskeriledi. Sondyqtan apatty úıdi jóndeý jáne tóleý somasy ártúrli bolady. Qazir úıdi turýǵa jaramsyz dep tanyǵan kezde ortasha ótemaqy bir sharshy metr úshin shamamen 200 – 240 myń teńge aralyǵynda belgilendi», dedi S.Shápkenov.
Ákimniń deregine súıensek, qazir Qulsary qalasyndaǵy tasqyn sý basqan úılerdi baǵalaý jumysy jalǵasyp jatyr. Ony osy aptanyń sońyna deıin aıaqtaý josparlanyp otyr. Al jyljymaıtyn múlikti baǵalaý komıssııasyna 2 727 ótinish túsken.
«Tasqyn sý basqan 1 myńǵa jýyq úı apatty dep tanyldy. Qazir 500 turǵynǵa baǵalaý qorytyndysy týraly aqparat berildi. Onyń ishinde apatty úıdiń 105 ıesi, baspanasyna kúrdeli jóndeý júrgiziletin 53 turǵyn ótemaqy somasyna kelisip, kelisimshartqa otyrdy. Turǵyn úılerdi baǵalaý osy aptanyń sońyna deıin júrgiziledi. Mamandar táýlik boıy jumys istep júr», dedi oblys ákimi.
Aýdan ortalyǵy – Qulsary qalasyndaǵy «Bolashaq» shaǵyn aýdanynda 70 úıdiń qurylysy bastaldy. Bul shaǵyn aýdanda 150 úı salý josparlanyp otyr.
«Tasqyn sýdyń saldarynan zardap shekken 301 kásipkerden keltirilgen shyǵyndy óteý jóninde ótinish tústi. Zardap shekken kásipkerlerge keńes berý ortalyǵy ashyldy. Al turǵyndardan múliktik zalaldy óteýge 2 707 ótinish túsip, onyń 416-synyń qorytyndysy daıyn boldy. Múliktik zalal úshin 150 aılyq eseptik kórsetkish mólsherinde ótemaqy beriledi», dedi S.Shápkenov.
Jylyoı aýdandyq kásipkerlik jáne aýyl sharýashylyǵy bóliminiń basshysy Nurtas Qýatbaevtyń málimetinshe, tasqyn sýdyń saldarynan turǵyndar ıeligindegi 876 mal men 532 qus ólgeni anyqtalyp otyr. Osyǵan baılanysty atalǵan bólimge 101 ótinish túsipti.
«Sý tasqyny kezinde ólgen maldyń ishinde 697 qoı-eshki, 93 múıizdi iri qara, 55 jylqy, 31 túıe jáne 532 qus bar. 20 mamyrdan beri 23 turǵynǵa ólgen malyna jalpy somasy 25,6 mln teńgeniń ótemaqysy tólendi. Endi 78 turǵynǵa ótemaqy mamyrdyń sońyna deıin tólenedi. О́temaqynyń jalpy somasy 93,5 mln teńgeni quraıdy», deıdi N.Qýatbaev.
Qulsary qalasyna tótenshe jaǵdaı engizilgen 4 sáýirden beri 1 myń tonnadan asa gýmanıtarlyq kómek jetkizildi. Osyndaǵy eriktiler shtabynyń jetekshisi Janargúl Sharǵabaevanyń aıtýynsha, gýmanıtarlyq kómek ortalyǵynda azyq-túliktiń mol qory bar. Azyq-túlikti 60-qa jýyq erikti turǵyndarǵa taratyp júr.
«Sý tasqynynan zardap shekken turǵyndarǵa azyq-túlik arnaıy kestege sáıkes taratylady. Qazir 500-ge jýyq otbasyn qajetti zattarmen qamtamasyz etip otyrmyz. Jaqynda 20 tonnalyq júk kóligimen gýmanıtarlyq kómek jetkizildi. Ony 4 pýnkt arqyly taratýdy qolǵa aldyq. Qazir un, muzdatylǵan qus eti, jumyrtqa, jarma, jaıalyq pen tósek jabyndysy sekildi azyq-túlik pen qajetti zattardyń qory jınaqtaldy. Qulsary qalasyna uzaq saqtalatyn azyq-túlik, gıgıenalyq quraldar men turmystyq hımııalyq zattar oblys ortalyǵynan jetkizilip jatyr», dedi J.Sharǵabaeva.
Mine, Qulsary qalasynda tasqyn sýdyń zardabyn joıý maqsatynda osyndaı jumystar iske asyrylyp jatyr. Munyń bári zardap shekken turǵyndardyń qalypty tirlikke oralýyna yqpal etý úshin qolǵa alynǵan. Keshe Jylyoı aýdany ákimdiginiń aldynda birneshe kún turǵan qulsarylyq turǵyndar tarady. Muny aýdandyq ákimdik turǵyndardyń sý basqan úı úshin beriletin ótemaqyǵa baılanysty jumystarǵa túsinistikpen qaraýy dep baǵalady.
Atyraý oblysy
