Taı elindegi týrnırde 133 memleketten kelgen 600 úmitker kúsh synasady dep kútilýde. Erler men áıelderdi qosa alǵanda, 13 salmaq dárejesi boıynsha 51 (28 erler, 23 áıelder) joldama sarapqa salynady. Al Olımpııa oıyndarynda barlyǵy 248 boksshy baq synaıdy. Ol lısenzııalardyń deni byltyr Hanchjoýdaǵy Azııa oıyndary men Italııadaǵy irikteý jarysynda taratylǵan bolatyn.
Qazaqstannyń qorjynynda ázirge jeti lısenzııa bar. Olardyń ıegerleri – Sáken Bıbosynov (51 kg), Sabyrhan Mahmud (57 kg), Aslanbek Shymbergenov (71 kg), Nurbek Oralbaı (80 kg), Aıbek Oralbaı (92 kg), Qamshybek Qońqabaev (+92 kg) jáne Karına Ibragımova (57 kg). Parıjge tolyq qurammen barýǵa erlerge jalǵyz joldama jetpeı tur. Sol olqylyqtyń ornyn toltyrý úshin Taılandta 63,5 kg salmaq dárejesinde Muhammedsabyr Bazarbaıuly judyryqtasady. Al áıelder arasyndaǵy jarysta Nazym Qyzaıbaı (50 kg), Uljan Sársenbek (54 kg), Rımma Volosenko (60 kg), Natalıa Bogdanova (66 kg) jáne Valentına Halzova (75 kg) kúsh synasady.
Joǵaryda esimderi atalǵan bylǵary qolǵap sheberleriniń barlyǵy da bıyl Astanada ótken elishilik irikteý týrnırinen irkilmeı ótip, ózderiniń myqtylyǵyn moıyndatqan saqa sportshylar. Sol sebepti de jankúıerler olardyń elge oljaly oralatynyna senimdi. Bangkokta ótetin bul báseke 2 maýsymda óz máresine jetedi.
