Elimizdiń eń úzdik gımnasshysy, birqatar halyqaralyq jarystyń jeńimpazy jáne júldegeri, Azııanyń absolıýtti chempıony degen ataǵy bar 18 jastaǵy shymkenttik sportshy elordada jalaýy jelbiregen jarystyń qorytyndysy boıynsha 133.150 upaı jıdy. Bul nátıje Eljana Tanıevaǵa kezekti ret Qazaqstan chempıony ataný úshin jetkilikti boldy. Kúmis medaldy astanalyq Mılana Parfılova (131.850 upaı) ıelense, qola júldeni taǵy bir elordalyq Aıbota Ertaıqyzy (127.900 upaı) enshiledi. Taǵy bir tanymal gımnasshy Erıka Jaılaýova (127.800) tórtinshi orynda qalyp qoıdy.
– Jýyrda ǵana Tashkentte ótken Azııa chempıonaty fızıkalyq turǵydan ǵana emes, psıhologııa jaǵynan da óte aýyr boldy. Sebebi kez kelgen bapker óz shákirtiniń Olımpııa oıyndaryna qatysqanyn qalaıdy. Bul joly lısenzııany jeńip alýdyń ózi ońaı bolǵan joq. Azııa chempıonaty men Qazaqstan chempıonatynyń arasy jaqyn bolǵanymen, bul jarystan bas tarta almaımyz. О́ıtkeni bul – elimizdegi eń basty doda. Qıyn bolsa da, Eljana sońyna deıin kúresip, bas júldeni oljalady. Jeńis tuǵyryna kóterilgen ózge arýlardyń da ónerine rızamyn, – deıdi ulttyq komandanyń bas bapkeri Álııa Iýsýpova.
Komandalyq saıysta Shymkent shaharynyń sportshylary (60.550 upaı) birinshi oryndy ıelense, Astana qalasy (54.600 upaı), Shyǵys Qazaqstan oblysynyń (46.550 upaı) ókilderi ekinshi jáne úshinshi satylarǵa jaıǵasty.
