Osyǵan oraı Astanada jazǵy sport túrlerinen paralımpıadalyq jattyǵý ortalyǵynyń aýqymy keńeıedi. 2018 jyly Astanada ashylǵan jazǵy jáne qysqy paralımpıada sport túrlerinen ulttyq quramalar men sporttyq rezervterdi kásibı daıarlaýǵa arnalǵan nysan bıyl jańa sport alańdarymen tolyqtyrylmaq. Múgedektigi bar adamdarǵa arnalǵan mundaı ortalyqtar AQSh, Ulybrıtanııa, Japonııa, Ońtústik Koreıada bar.
Atalǵan jobaǵa Qazaqstan Ulttyq paralımpıada komıtetiniń prezıdenti Qaırat Boranbaev qarjy bólmek jáne bul biregeı sport nysany ǵana emes, sondaı-aq erekshe qajettiligi bar adamdarǵa arnalǵan jabdyqtarǵa qyzmet kórsetý ortalyǵy bolmaq.
«Ortalyqta otyryp oınaıtyn voleıbol, basketbol, bochcha jáne arbadaǵy regbı, golbol, arbadaǵy tennıske arnalǵan sport zaldary bar. Ǵımarattyń jalpy aýdany 3431 sharshy metrdi quraıdy, sport zaldarynyń kólemi 48/26 metrge deıin jetedi. 2020 jyly ÝEFA jobalyq qujattamany ázirleýge 45 myń eýro bólgen, bul jobanyń sport qaýymdastyǵy úshin mańyzdy ekenin kórsetedi», dedi Ulttyq paralımpıada komıtetiniń prezıdenti.
Ortalyq adamdardyń fızıkalyq múmkindigine qaramastan barlyǵyna qoljetimdi bolatyn arnaıy kótergishtermen jáne lıftilermen jabdyqtalady. Jobaǵa ÝEFA prezıdenti Aleksandr Cheferınniń ózi qoldaý bildirgen.
«Munda qyzmet etetinder de, jattyqtyrýshylar da – erekshe qajettiligi bar jandar. Munyń bári olardyń birin-biri jaqsy túsinip, qoǵam ómirine erkin aralasýy úshin qajet. Múgedektigi bar kez kelgen adam osynda kelip tegin jattyǵa alady. Mundaǵy arnaıy medısınalyq kabınet kelýshilerdiń densaýlyǵyn tekserip, kimge qanshalyqty júkteme berýge, qandaı sport túrimen shuǵyldanýyna bolatynyn anyqtaıdy. Sport nysanyndaǵy baspaldaq pen pandýstan bastap jaryq jaǵý núktelerine deıin múgedek jandardyń jaǵdaıyna qaraı jabdyqtalǵan. Barlyǵy halyqaralyq talaptarǵa saı», dedi atalǵan komıtettiń bas hatshysy Oljas Aqpambetov.
Onyń aıtýynsha, Astanadaǵy jańa paralımpıadalyq ortalyq – jaı ǵana sport nysany emes, erekshe qajettiligi bar adamdardyń áleýmettik damýy úshin biregeı alań. Paralımpıadalyq ortalyq bolashaqta álemdik chempıonattar men halyqaralyq jarystar ótkizýge nıetti. Sondaı-aq bilim júıesin álemdik deńgeıge jetkizý josparda bar.
«Ortalyqqa 2021 jyly ota jasatqannan keıin keldim. Maǵan qalqansha beziniń qaterli isigi dıagnozyn qoıdy. Bári endi tolyqqandy ómir súre almaısyń dedi. Men sol sátte ómirden kúderimdi úzdim, salym sýǵa ketti. Kóp keshikpeı osy ortalyqqa keldim. Paralımpıada ortalyǵy meni ómirge qaıta alyp kelgendeı boldy. Búginde ústel tennısinen biraz jetistikke jettim. Respýblıkalyq, qalalyq jarystardyń birneshe dúrkin jeńimpazy atandym. Sondaı-aq halyqaralyq kontentorǵa tórelik etemin. Bul – bir kezde ómirden kúder úzgen men úshin úlken jetistik», deıdi 51 jastaǵy paralımpıadashy Olga Korh.
Jýyrda Astanada 2024 jyly Parıjde ótetin paralımpıada oıyndaryna 100 kún qalǵanda Qazaqstan men Brazılııa arasynda voleıboldan joldastyq kezdesý ótip, qurama komandamyz taǵy bir belesti baǵyndyrdy.
«Voleıboldan qurama komandanyń kórsetkishi jaman emes. Qazir Fransııa komandasymen joldastyq kezdesýge daıyndalyp jatyrmyz. Odan keıin Mysyr komandasymen baq synasamyz. Buryn voleıboldan paralımpıadaǵa 12 komanda qatyssa, qazir irikteýden ótken segiz komanda ǵana qatysady», deıdi voleıboldan paralımpıada komandasynyń jattyqtyrýshysy Baýyrjan Tahaýov.
Al blind fýtbol degendi estýińiz bar ma? Bul – nashar kóretin adamdarǵa arnalǵan fýtbol túri. Osy ortalyqta kózi múlde kórmeıtin sportshylardan quralǵan fýtbol komandasy bar.
«Meniń týǵannan kórý qabiletim tómen. Ýaqyt óte kele kórýim tipti qıyndaı tústi. Osy ortalyqqa kelgenshe ózimdi qoǵamnan bólek, kem sezinetinmin. Sport múmkindikterdiń sheksiz ekenin kórsetti. Komandanyń oınyna syrttan qarap turǵan adam bizdiń zaǵıp ekenimizge senbeıdi. Qazir áıelim, tárbıelep otyrǵan eki balam bar. Alǵa qoıǵan josparymyz, maqsatymyz kóp», deıdi fýtbolshy Qanat Aqynbaev.
Paralımpıadalyq ortalyq – álemdik chempıonattar men halyqaralyq jarystar ótetin oryn, sondaı-aq álemdik deńgeıdegi bilim ortalyǵy bolady dep josparlanyp otyr. Alda ortalyqtyń janynan taǵy da bir qurylys nysany salynady. Qurylys quny – 4,2 mıllıard teńge, ashylýy 2026 jylǵy 1 tamyzǵa josparlanǵanyn aıtady ortalyq qyzmetkerleri.
