Foto: akorda.kz
Maqala eýropalyq oqyrmanǵa – saıasatkerlerge, saıasattanýshylarǵa jáne eski álemniń qarapaıym azamattaryna kóbirek arnalǵany baıqalady. Biraq Qazaqstan azamattary úshin de maǵlumaty mol. Sebebi, kez kelgen prezıdenttiń halyqaralyq arenadaǵy áreketi ulttyq múddelerdiń kórinisimen toǵysady.
Materıaldyń kirispesinde Prezıdent kótergen máseleniń máni kórsetilgen. Qasym-Jomart Toqaev orta derjavalardyń kópjaqtylyǵy taqyrybyna Astana halyqaralyq forýmynda, BUU Bas Assambleıasynyń trıbýnasynda, «Bir beldeý – bir jol» forýmynda, Germanııaǵa resmı sapary kezinde de toqtalǵan edi. О́tken aptada Sıngapýrǵa resmı sapary aıasynda Qazaqstan Prezıdenti «Qazaqstan jáne orta derjavalardyń róli: qaýipsizdikti, turaqtylyqty jáne ornyqty damýdy ilgeriletý» taqyrybynda dáris oqydy. Ol Euronews-tegi maqalamen de úndesedi.
Qasym-Jomart Toqaev Qazaqstan sııaqty elder jańa kúshpen birge alǵa qadam basyp, jahandyq arenadaǵy jaýapty menedjerler retinde áreket etýi tıis ekenin jazdy.
Memleket basshysy atap ótkendeı, sońǵy ýaqytta álem alaýyzdyqqa tolyp barady. Alpaýyt memleketter de birigý ornyna tarydaı shashylyp barady. Al BUU Qaýipsizdik keńesiniń turaqty músheleri ıelik etetin veto quqyǵy kóbinese tyǵyryqqa tirelip, daǵdarysty sheshýge qaýqarsyz. Ujymdyq áreketterge qaraǵanda birjaqty kózqarasqa basymdyq berilip jatady. Osy tusta Qazaqstan Prezıdenti Qasym-Jomart Kemeluly memleketaralyq dostyqqa dem berýge shaqyrdy. Bul rette Qazaqstan syndy orta derjavalar kómektese alady.
Prezıdenttiń pikirinshe, qazir júrip jatqan soǵystar oń sheshilmeı, birneshe jylǵa sozylyp jatyr. Bul tek soǵysqa qatysýshy elderge ǵana emes, tutas geosaıası alańǵa kesirin tıgizip jatqany anyq.
«Ýkraınadaǵy qaqtyǵys dıplomatııalyq tyǵyryqqa tireldi, Gaza sektoryndaǵy qazirgi jaǵdaı epıkalyq gýmanıtarlyq apat bolyp tanyldy, al Úndi-Tynyq muhıty aımaǵyndaǵy shıelenis soǵysqa ulasyp barady. Birikken Ulttar Uıymy sııaqty halyqaralyq konsensýsqa yqpal etýge arnalǵan qurylymdar da tyǵyryqqa tirele bastady», deıdi Memleket basshysy.
Osy tusta «orta derjavalardyń «úlken oıynshylardan» aıyrmashylyǵy nede?» degen suraq týyndaıdy. Qazaqstan kóshbasshysy bul saýalǵa da jaýap berdi.
El Prezıdenti Qasym-Jomart Toqaevtyń maqalasyn myna silteme arqyly oqýǵa bolady.
