Áńgimemizdi pleı-off saıystarynan bastasaq, shırek fınaldaǵy eń qyzyqty oıyn Pragadaǵy O2 arenasynda ótti. Bul matchta Kanada Slovakııanyń qaqpasyna 6 gol soqsa, qarsylastary 3 shaıbamen ǵana jaýap qaıtardy. Esep – 6:3. Shveısarııa Germanııany 3:1 esebimen utty. Chehııa men AQSh arasyndaǵy básekeniń taǵdyryn bir ǵana gol sheshti – 1:0. Shvesııa men Fınlıandııa quramalary da biraz tiresti. Kórshiles qos memleket hokkeıshileriniń tartysy shvedterdiń paıdasyna sheshildi – 2:1.
Jartylaı fınalda sensasııalyq nátıje tirkeldi. Sońǵy álem chempıonatynda qarsylas shydatpaı, bas júldeni oljalaǵan Kanada oıda-joqta Shveısarııadan utylyp qaldy. Bul matchta alǵashqy eki shaıbany Kevın Fıal men Nıno Nıderraıter óz enshilerine jazdy. Biraq oıyn aıaqtalǵanǵa deıin Úıeńki japyraqtar eliniń ókilderi tarazy basyn teńestirdi. Bul goldardyń avtorlary – Brendon Tanev pen Djon Tavares. Overtaımda da jeńimpaz anyqtalǵan joq. Býllıt soǵý barysynda shveısarııalyqtardyń baǵy jandy – 3:2. Al Chehııa men Shvesııa arasyndaǵy kezdesý 7:3 esebimen aıdyn ıeleriniń paıdasyna sheshildi.
Fınalda Shveısarııa men Chehııa kezdesti. Alǵashqy eki kezeńde birde-bir shaıba qaqpaǵa enbedi. Tablodaǵy esep 50-mınýtta ózgerdi. Esepti juldyzdy shabýylshy Davıd Pastrnıak ashty. Oıynnyń aıaqtalýyna sanaýly sekýnd qalǵanda Davıd Kempf bos qaqpany dál kózdedi. Sóıtip, 2:0 esebimen jeńiske jetken chehtar álem chempıony atandy. Al qola medal úshin básekede Shvesııa Kanadany qapy qaldyrdy – 4:2.
Esterińizge sala keteıik, Chehııadaǵy dodaǵa Qazaqstan quramasy da qatysty. Jeti kezdesýdiń ekeýin utyp, beseýinde jeńilis tapqan jerlesterimiz V tobynda altynshy oryndy qanaǵat tutty. Osy nátıje arqyly Ǵalym Mambetálıevtiń shákirtteri kelesi jyly elıtalyq dıvızıonda óner kórsetý quqyǵyn saqtap qaldy.
Sonymen qatar Pragada Halyqaralyq hokkeı federasııasynyń kezekti kongresi ótip, osy jıyn barysynda 2028 jylǵy álem chempıonatyn qabyldaıtyn memleket anyqtaldy. Ondaı quqyq Fransııanyń Parıj ben Lıon qalalaryna berilip otyr. Al kelesi jylǵy jarys Shvesııanyń Stokgolm men Danııanyń Hernıng qalalarynda uıymdastyrylady. 2026 jylǵy doda Shveısarııanyń Sıýrıh pen Frıbýrginde, 2027 jylǵy týrnır Germanııanyń Dıýsseldorf pen Mangeıminde ótedi.
