Foto: Túrkistan oblysy ákimdigi
Atalǵan ıntellektýaldy saıystyń fınaldyq kezeńine Túrkistan oblysy ákiminiń orynbasary Beısenbaı Tájibaev, Mádenıet jáne aqparat mınıstrliginiń Jastar jáne otbasy isteri komıteti tóraǵasynyń orynbasary Birjan Álimjanov qatysyp, jeńimpaz atanǵan jastardy marapattap, sáttilik tiledi.
– Túrkistan tórinde jyl saıyn dástúrli túrde ótkiziletin respýblıkalyq «AL-FARABI» ıntellektýaldy oıyny bıyl da óz jalǵasyn taýyp otyr. Bul saıys oblysymyzda «Jastar resýrstyq ortalyǵynyń» uıymdastyrýymen jyl saıyn turaqty ótkizilip keledi. Naǵyz bilimge qushtar, únemi izdenis jolynda júretin jastardyń basyn biriktiretin respýblıkalyq deńgeıdegi ıntellektýaldy saıystardyń bizdiń óńirimizde ótip jatqandyǵy kóńil qýantady. «Bilekti birdi jyǵar, bilimdi myńdy jyǵar» degendeı, saıysqa qatysyp óz baqtaryn synaǵan barlyq komandaǵa alǵys aıtamyn. Atalǵan saıystyń irikteý kezeńderinen dara shyǵyp, fınaldyq kezeńderge joldama alǵan komandalarǵa sáttilik tileımin, – dedi oblys ákiminiń orynbasary Beısenbaı Tájibaev.
Túrkistan oblysy qoǵamdyq damý basqarmasynyń «Jastar resýrstyq ortalyǵy» KMM-niń uıymdastyrýymen ótkizilgen sharanyń maqsaty – daryndy jastardy qoldaý, olardyń tanymdyq qyzyǵýshylyqtaryn oıatý arqyly bilim deńgeıin kóterý. Sondaı-aq ıntellektýaldy ortany qalyptastyrý, jastar arasynda oratorlyq mádenıetti, toleranttyq tártippen azamattyq tanymdy damytý. Túrkistan tórinde naǵyz bilimdi jastardyń basyn qosqan bul saıysqa 100-ge jýyq komanda ótinim bergen. Onyń ishinde Túrkistan oblysynan bólek, Astana, Almaty, Shymkent qalalary men Jambyl, Pavlodar jáne Qyzylorda oblystarynan da komandalar bar.
Oıynnyń irikteý kezeńinde ózara myqtyny anyqtaǵan komandalar, tartysqa toly oıynnyń kórkin qyzdyrdy. Fınalǵa joldama alǵan komandalar kórermenderge tamasha kóńil kúı syılady.
Jalpy 72 komanda arasynan shırek fınalǵa ótken 12 komanda shyqty. Olardyń tórteýi fınaldyq kezeńniń joldamasyn sarapqa salyp, nátıjesinde birinshi oryndy Saıram aýdanynyń «Erýdıt» komandasy jeńip aldy. Al ekinshi oryndy Jambyl oblysynan kelgen «Chicago bulls» komandasy alsa, úshinshi oryn báıdibektik «BBC» komandasyna buıyrdy. I oryn alǵan komandaǵa 1000 000 teńge, II orynǵa 500 000 teńge jáne III oryn ıegerlerine 300 000 teńge qarjylaı syılyq tabystaldy. Saıysqa qatysqan ártúrli komandalarǵa «Úzdik ujym», «Úzdik bilimger», «Úzdik top basshy», «Úzdik jaýap», «Úzdik kıim úlgisi» nomınasııalary berildi.
Aıta keteıik, ıntellektýaldy oıynnyń birinshi kezeńi 28 mamyr kúni «Farab» ámbebap ǵylymı kitaphanasynda ótken bolatyn.
