Bekjannyń lırıkalyq óleńderin oqı otyryp onyń mazmunynan ózimiz ómir súrip jatqan búgingi zamannyń syry men sıpatyn, qoǵamnyń ár alýan qubylystaryn, adamdardyń boıyndaǵy san qıly minez ben erekshelikterdi jazbaı tanımyz. Aqyn aınalada bolyp jatqan oqıǵalardyń bárin oı eleginen ǵana emes, júreginen de ótkizip, árbir jyryn tolǵatyp jazady. Sóıtip, oqyrmandy eriksiz eliktirip áketedi. Sondaı-aq aqyn oıyn barynsha astarlap aıtýǵa umtylady. Oǵan «Telefony tyńdalatyn adamdaı, Ádebıette sóıleý kerek tuspalmen», degen óz sózi dálel. Budan bólek, Bekjan «Jańyl men Jalǵasbek», «Qymyz ıisin izdeý», «Ekinshi Jeltoqsan», «Sýisherim», «Qara shal», «Nostalgııa» sekildi jyrlarynda ulttyq tanymdy tańbalaı otyryp, adam men qoǵam shyndyǵyn anyq ańǵartady. Máselen, onyń «Áke-kóńil aýyl joǵyn izdep tur, Jańyldan soń, Jalǵasbegin kútkendeı!», degen tarmaǵynan ulttyq uǵymnyń úzdik úılesimin kóremiz. Aqyn aýyldaǵy aqıqattyń qaıtys bolǵanyn, biraq sonda da jaqsylyqtyń tańy ataryna álde de úmitti ekenin qazaq uǵymyna saı kelisti teńeý, janyna jaqyn balama arqyly sátti beınelegen. Áshirbaev óleńderinde osyndaı bútin bir ulttyń bitim bolmysyna sińip ketken uǵymdardy búgingi shyndyqpen bettestirip, ózgeshe oı sabaqtaıdy. Jekelegen shýmaqtar men joldarǵa ulttyq minez sáýlesin syıǵyzyp, astarly aqıqat, ántek ázilmen ajarlaı biledi. «Bas báıgeni únemi alý sezimi, Birdeı shyǵar ony múldem almaýmen», «Qazaqshalap sóılegenge tańǵaldyq, Tisi bútin kempir kórgen sekildi», «Jamal qart áńgimesin bastaýshy edi, Aldaǵan bolmaıdy dep tarazydan», degen tarmaqtar aqynnyń ulttyq psıhologııa ıirimderine emin-erkin boılaıtynyn baıqatady.
Jalpy, Bekjan poezııasyna tán bir erekshelik – ol zaman talabyna saı tilimizge enip jatqan termınderdi óleńderinde qulpyrtyp, sátti paıdalanady. Bul da jańany izdeýden, sony súrleý tabýǵa degen talpynystan týǵan dúnıe. Máselen, «Jańalyq oqyǵandaı ótedi ómir, Júgirtpe joldary bop ekrannyń», «Karta oınaǵaly kazıno barsań, Ol qaıta seni oınap tynady», «Baıansyz bul fánıden, Faıldaı óshemiz-aý», «Op-ońaı jınalar joq bedel, Lúpilge táýeldi saıt-sana», degen syndy birneshe mysal keltirýge bolady. Mundaı basqa tilden engen nemese halyqaralyq termınderdi óz shyǵarmalarynda utymdy paıdalaný Bekjan poezııasynda jıi kórinis beredi ári bul búgingi poezııa úshin jańalyq ekenin de atap ótkenimiz jón. Alaıda aqyn óleńderinde qansha jerden neologızmderdi naqyshyna keltirip qoldansa da, ulttyq tanym-túsinikten alystamaıdy. Onyń týyndylarynda dáýir shyndyǵyn poetıkalyq tilmen beıneleı alatyn oınaqylyq ta, oılylyq ta bar. Ol sonysymen erekshe.
Aıtpaqshy, Bekjan Áshirbaev oqyrmandaryna jaqsy jańalyq. Jaqynda aqynnyń ekinshi kitaby jaryq kóredi. Muny aqynmen suhbattasyp, Almaty barǵan saparymyzda bildik.
Já, osy jerden áńgimemizdiń tizginin tarta turaıyq. Aqynnyń óz sózimen aıtar bolsaq, «Jambyl da kóp sóıleýdi unatpaǵan, Jambyldyń kóp sóılegen jasy ǵana»...
