Foto: kaz.tengrinews.kz
Sharshy alańǵa 15 ret kóterilip, barlyq básekede jeńiske jetken qazaqtyń ataqty boksshysy 13 shildede Las-Vegasta 26 jastaǵy Andreı Mıhaılovıchpen judyryqtasady. Reseıdiń Sankt-Peterbýrg qalasynda dúnıege kelgen boksshy bul kúnderi Jańa Zelandııada turyp jatyr. Boıy – 189 santımetr. Kásipqoı rıngtegi karerasyn 2018 jyly bastady. Sol aralyqta 21 kezdesý ótkizip, barlyǵynda basymdyq tanytty. 13 básekeni merziminen buryn aıaqtady. Bir aıta keterligi, Mıhaılovıch óziniń barlyq jekpe-jegin Jańa Zelandııa men Aýstralııada ótkizdi. О́zge memleketterge shyqqan emes. Qazirgi kezde ol – IBF nusqasynyń chempıondyq ataǵyna mindetti úmitker.
Joǵarydaǵy aqparat taraǵan bette Jánibek Álimhanuly: «Osy jekpe-jekti taǵatsyzdana kútip júrmin. Maǵan chempıondyq ataqtarymdy sátti qorǵaý esh qıyndyq týǵyzbaıdy. Sóz oraıy kelgende, Andreı Mıhaılovıchke óz rızashylyǵymdy bildiremin. Orta salmaqtyń chempıondary menimen judyryqtasýdan bas tartqan kezde ol batyldyq tanytyp, kelisim berdi. Endi 13 shildede «Qazaq Style» qandaı bolatynyn kúlli álem jurtshylyǵy qaıta kóredi. Sóıtip, absolıýtti álem chempıony ataǵy úshin joryq jalǵasyp jatyr. Qazir meniń jolymda Mıhaılovıch tur», dep málimdedi.
Jańa Zelandııanyń ókili de únsiz qalmady. Ol: «Bile bilseńizder, Jánibek – meniń jolymda turǵan jaı ǵana bir boksshy. Alǵa qoıǵan maqsatyma qoljetkizý úshin ony jaıpap ótýge kúsh-qýatym jetetinine senimdimin. Bálkim, bázbireýler «Ol múmkin emes» dep aıtýy múmkin. Biraq men úshin bári múmkin. Álimhanulyna tıesili eki birdeı altyn belbeýdi odan tartyp alý úshin osy aıqasta barymdy salamyn», dep jer-jahanǵa jar saldy.
