Bul týraly Dınara Zakıeva jeli paraqshasynda jazdy.
«Atalǵan qylmys boıynsha aqpan aıynan bastap Ishki ister mınıstrligimen, Bas prokýratýra jáne Shymkent qalasy boıynsha balalar ombýdsmenimen birlesip jumys istep jatyrmyz. Bul jerde kóptegen sumdyq málimetter bar. Úlken balanyń bergen jaýabyna sáıkes, balalarǵa zár ishkizip, nájis bergen. Is sotqa jiberildi»,-dep jazdy Dınara Zakıeva.
Budan ózge úlken balaǵa memleketten berilip kelgen jınaqtalǵan qarjysynyń jumsalý deregi boıynsha da tergeý júrgizilip jatyr. Boljam boıynsha ol qarjy balanyń ózi baqqan eshkini satyp alýǵa jumsalǵan bolýy múmkin.
«Bul rette úlken balanyń denesindegi kógergen izderdi kórgen mektep muǵalimderine, sondaı-aq qorǵanshylyq organyna qoıylar suraq kóp. Olardyń da ústinen qylmystyq is qozǵalyp, tergeý júrip jatyr»,-delingen jazbada.
Shymkenttegi bul fakt elimiz boıynsha sońǵy birneshe aıda asyrap alynǵan balalarǵa qatysty jasalynǵan tórtinshi oqıǵa bolyp otyr eken.
Balalar ombýdsmeniniń dereginshe, elimizde qamqorshylyq organy qyzmetkerleriniń sany bala sanyna shaqqanda óte az. Máselen, jyl basynda Shymkentte 485 myń balaǵa 5 qamqorshylyq qyzmetkeri, ıaǵnı bir qyzmetkerge 90 myń baladan kelgen. Oǵan qosa bul qyzmetkerlerdiń alyp otyrǵan jalaqysy da mardymsyz.
«Qorǵanshylyq qyzmetkerleriniń jetispeýshiligi máselesin júıeli sheshý úshin biz Balalardyń quqyqtaryn qorǵaý komıtetimen jáne depýtat Iý.V.Kýchınskıımen birlesip, qorǵanshylyq jáne qamqorshylyq jónindegi qyzmetkerlerdiń quzyreti men normatıvtik sanyna qatysty zańǵa ózgeris engizý boıynsha túzetýler engizip, usynys joldadyq. Bul túzetýler qazirgi tańda Úkimettiń qaraýynda», – dep jazdy Dınara Zakıeva.
Atalǵan túzetýler qabyldansa, halyqaralyq standarttarǵa saı 5 myń balaǵa 1 qorǵanshylyq qyzmetkeri beriledi. Iаǵnı, Shymkentte 90 qyzmetker bolady. Sonymen qatar olardyń jalaqysy 50 paıyzǵa artady.
Oblystyq jáne respýblıkalyq mańyzy bar qalalardaǵy ákimdikter qorǵanshylyq qyzmetkerleri sanyn kóbeıtý máselesin qoldaıtynyn jazbasha rastaǵan. Al jalaqyny kóbeıtýdi úsh óńirden basqa ákimdikter qoldap otyr. Qazirgi tańda kelisimin bermegen jergilikti atqarýshy organdarmen jumys júrgizilip jatyr.
Eske salsaq, biz buǵan deıin Shymkentte alty balany asyrap alǵan er kisi olardy ábden qınap, azaptap kelgeni týraly aqparat taraǵan. Balalardyń aıtýynsha, er adam olardy jumysqa jegip, jýyndyrmaı, aıaq-qolyn baılap ustaǵan. Tipti ıt pen mysyq soıyp, solardyń etin bergen.
