Parıjde tolyq quramda judyryqtasady

Senbi kúni 75 kg salmaqtaǵy Valentına Halzova 1/8 fınalda mońǵolııalyq Erdentýıa Enkhbaatarmen kezdesti. Bul báseke jerlesimizdiń jeńisimen aıaqtaldy. Ekinshi raýndta ol qar­sylasyn nokdaýnǵa jiberdi. 50 kg salmaq dárejesinde baq sy­naǵan Nazym Qyzaıbaı dál sol mejede ulybrıtanııalyq Savanna Sablımen kúsh synasty. Ol da Halzovadan qalyspaı, Tumandy Albıon eliniń ókilin úshinshi raýndta eseńgiretti. Muhamedsabyr Bazarbaıuly men kýbalyq Erıslandı Alvarestiń arasyndaǵy shırek fınaldyq aı­qasty tóreshiler bura tartyp, jeńisti Bostandyq aralynyń bylǵary qolǵap sheberine bergen edi. Desek te qandasymyz joldamaǵa talasý múmkindigin saqtap qaldy. Sebebi sol mejede jeńilis tapqan jampozdar ózara judyryqtasyp, 63,5 kg salmaq dáre­jesindegi sońǵy lısenzııany sarapqa saldy. Alǵashynda ol kolýmbııalyq Hose Vıafaramen judyryqtasty. О́te shıelenisti ótken jekpe-jektiń birinshi kezeńinde Muhamedsabyr basym boldy. Ekinshisinde Hoseniń baǵy jandy. Úshinshi raýndta jaraqat alǵanyna qaramastan, qazaq boks­shysy jeńisti qarsylasynan julyp áketti.

Jeksenbide sheshýshi saıys­tar ótti. Alǵashqy bolyp rıngke Valentına Halzova shyqty. Ol kolýmbııalyq Shırleıdıs Oroskodan basym tústi. Keshki baǵ­darlamada Nazym Qyzaıbaı men Sý Hıan Kanmen qolǵap túıistirdi. Birinshi raýndty Soltústik Koreıanyń ókili óz paıdasyna sheshti. Ekinshisinde qandasymyzdyń mysy basym boldy. Sheshýshi kezeńde namysqa tyrysqan Qyzaıbaı Kandy bir márte eseńgiretip, jeńis toıy­n toılady. Odan keıin kezek Mu­hamedsabyr Bazarbaıulyna keldi. Bizdiń jigit moldovalyq Aleksandrý Paraskıvadan basym tústi. Barlyq tóreshi Muha­medsabyrdyń myqtylyǵyn mo­ıyn­dady.

Sóıtip, Qazaqstannyń erler quramasy Olımpııa oıyndarynda tolyq quramda óner kórsetedi. Muhamedsabyr Bazarbaıulyna (63,5 kg) deıin ondaı qurmetke Sáken Bıbosynov (51 kg), Mahmud Sabyrhan (57 kg), Aslanbek Shym­bergenov (71 kg), Nurbek Oralbaı (80 kg), Aıbek Oralbaı (92 kg),  Qamshybek Qońqabaev (+92 kg) bólengen edi. Sondaı-aq Parıj­ge baratyndardyń tizimine úsh bu­rymdymyz qosyldy. Olar – Nazym Qyzaıbaı (50 kg), Karına Ibra­gımova (57 kg) jáne Valentına Halzova (75 kg). Al barlyq sport túrleri boıynsha búgingi kúni jer­lesterimizdiń jeńip alǵan joldamalar sany 58-ge jetti.