«Mýzeı qyzmetkeri A.Popov qasıetti kitapshany shamamen 1950–1960 jyldar aralyǵynda qorǵa ótkizgen eken. Bir qyzyǵy, metaldan jasalǵan qorapshaǵa salynǵan jınaq ishindegi Quran aıattary arab tilinde qolmen jazylǵan. Qasıetti kitap salynǵan qorapshanyń túsi aqshyl-sary. Onyń beti túrli ósimdikke uqsas oıý-órnekpen bezendirilgen», deıdi oblystyq tarıhı-ólketaný mýzeıi zertteý jumystaryn qamtamasyz etý bóliminiń meńgerýshisi Laýra Baıtursynova.
Bir qyzyǵy, óńirdegi mýzeılerdiń birazynda kóne zamannan jetken Quran kitaptary saqtalǵan. Turǵyndardyń qolymen tabystalǵan qasıetti kitaptardyń ózine tán tarıhy da bar. Al oblystyq tarıhı-ólketaný mýzeıi qorynda saqtalǵan bul jınaq kóleminiń shaǵyn bolýymen erekshelenip tur.
«Osy kitapty tabystaǵan A.Popov ýaqytynda oblystyq-tarıhı ólketaný mýzeıinde qyzmet etken eken. Derekke júginsek, qasıetti kitap A.Popovtyń dosyna tıesili bolǵan. Dosy ómirden ótkennen keıin Quran aıattary jazylǵan shaǵyn jınaq mýzeı qyzmetkeriniń qolyna túsken. Ol bul qundylyqty mýzeı qoryna tabystaý týraly sheshim qabyldaǵan», deıdi mýzeı qyzmetkeri.
«Quran-tumar» dep atalatyn jádiger syrtyndaǵy metaldan jasalǵan qorapsha aıtarlyqtaı kónergeni baıqalyp tur. Syrtqy buıymnyń qaı jyly nemese qaı ǵasyrda jasalǵanyn naqty aıtý qıyn. Áıtse de, mamandar metaldyń aıtarlyqtaı eskirgenin eskerip, «Quran-tumar» jádigeriniń kem degende bir ǵasyr buryn jasalǵanyn alǵa tartyp otyr.
TARAZ
