Taraz qalasynda ornalasqan tehnıkalyq shyǵarmashylyq ortalyqtyń tárbıelenýshileri ekologııalyq aksııadan jınalǵan qoqys qaldyqtaryn kádege jaratýǵa nıet bildirip otyr. Jergilikti bılik keltirgen derekke sensek, olar aldaǵy ýaqytta qoqys qaldyqtarynan túrli qolóner buıymyn jasap, áýlıeatalyq áleýmettiń nazaryna usynbaq.
Tehnıkalyq shyǵarmashylyq ortalyqta tálim alyp jatqan jasóspirimder de is-sharaǵa qoldaý bildirip otyr. Olar qazirgi kezge deıin qoqys qaldyqtarynan 200-den astam kartına men qýyrshaqtar jáne ydystar ázirlep úlgergen. Qolónerge ańsary aýǵan jas talanttar aldaǵy ýaqytta budan da ózge buıymdar daıyndaıdy.
Budan bólek, bilim berý uıymdarynyń jas ǵalymdary ekologııany jaqsartýǵa baǵyttalǵan túrli joba ázirlep jatyr. Naqtyraq aıtsaq, Taraz qalasyndaǵy №7 mektep-gımnazııasynyń oqýshysy D.Tarasenko «Jaıaý júrginshiler ótkelderiniń qaýipsizdigin arttyrý», Merki aýdanyndaǵy M. Áýezov atyndaǵy mektep-lıseıdiń bilim alýshysy J.Jeńishan «Taza qala sizden bastalady», Jýaly aýdanyndaǵy Á. Bókeıhan atyndaǵy №15 mektep-lıseıdiń oqýshysy A. Ońdasyn «Aqyldy ekojylyjaı», Merkidegi №44 mekteptiń bilim alýshylary A. Erkinqyzy men О́.Eńsebek «Ekinshi ómir syıla» taqyrybyndaǵy jobalardy dúnıege ákelgen. Jasóspirimder munymen toqtap qalmaq emes. Olar taǵy da birneshe jobany ázirleýge qulshynyp otyr eken. Derekke sensek, qoqys qaldyǵyn óńdeıtin zaýyt jobalary aldaǵy ýaqytta Taraz qalasyndaǵy «Kórme» zalynda resmı tanystyrylmaq. Jambyl jurty «Taza Qazaqstan» ekologııalyq aksııasyna jańashyl ıdeıalarmen kirisip jatyr. Naýqan aıasynda jergilikti bılik birneshe baıqaý uıymdastyrýdy qolǵa alýǵa bekinip otyr. Qazirdiń ózinde birqatar aýdanda birneshe baıqaý ótkizilip qoıdy.
Oblys ortalyǵy mańyndaǵy Jambyl aýdanyna qarasty Ernazar aýlynda kelinder arasynda «Eń taza aýla» baıqaýy uıymdastyryldy. Is-sharaǵa 35 jasqa deıingi 9 kelin qatysty. Turǵyndar arasynda ekologııalyq mádenıet pen tazalyqty saqtaýdy nasıhattaý maqsatynda ótkizilgen baıqaý kópshiliktiń kóńilinen shyqty. Kelinder saıysyn baǵalaǵan qazylar alqasy aýyl kelinderiniń iskerligine rıza boldy. Al úzdik shyqqandar baǵaly syılyqtarmen marapattaldy.
Jalpy alǵanda «Taza Qazaqstan» ekologııalyq aksııasyna óńirdiń barlyq aýdany belsendi qatysyp jatyr. Oblys aýmaǵyndaǵy 10 aýdanda «Eń taza kóshe», «Eń taza aýla», «Eń belsendi erikti», «Eń belsendi aýyl turǵyny», «Eń úzdik aýla sypyrýshy» baıqaýlary ret-retimen uıymdastyrylyp jatyr.
Osy oraıda eriktilerdiń, belsendi azamattardyń eńbegin atap ótken jón. Naýqan aıasynda Taraz qalasyndaǵy «Mamyr» saıabaǵynda qala turǵyndarynyń qatysýymen talapqa saı sanıtarlyq-tazalyq jumystary júrgizildi. Al aýdandarda senbilikter men tazalyq jumystary turaqty túrde uıymdastyrylyp jatyr. Jergilikti bılik keltirgen derekke júginsek, Talas ózeniniń jaǵalaýyndaǵy, Aısha bıbi kóshesiniń boıyndaǵy qoqystar der kezinde jınaldy. Bul jumystar Baýyrjan Momyshuly kóshesinde aıaldamalardy árleý, «Uly dala», «Qarasý» shaǵyn aýdandarynda da jalǵasyn tappaq.
«Taza Qazaqstan» naýqany sheńberinde ótkiziletin túrli aksııalar aldaǵy kúnderi barlyq aýdanda ótpek. Naqtyraq aıtsaq, Baızaq aýdanynyń ortalyq saıabaǵy, Jambyl aýdanyndaǵy Aısha bıbi kesenesi, Merki aýdanyndaǵy Sypataı batyr, Sarysý aýdanyndaǵy Shoqaı datqa keseneleriniń mańyn qoqystan tazartý jumystary júrgiziledi. Sondaı-aq Shý qalasyndaǵy temirjolshylar saıabaǵynda da bul jumys jalǵasady.
Jambyl oblysy
