Sýretti túsirgen – Erlan OMAR, «EQ»
«Amanat» partııasy jalpaq jurtqa ortaq jaqsy iske muryndyq bolyp, «Taza Qazaqstan» road-estafetasyn bastaǵan bolatyn. Osy aptada partııanyń júzdegen belsendileri, «Jastar rýhy» jastar qanatynyń eriktileri, jalpy jurtshylyq Astana-Almaty tasjolynyń qos qaptalyn tazalap, aınadaı etip jarqyratyp qoıdy. Ilkimdi is-sharaǵa «Amanat» partııasynyń atqarýshy hatshysy Dáýlet Káribek, Ekologııa jáne tabıǵı resýrstar mınıstri Erlan Nysanbaev, Qazaqstannyń qaıtalama shıkizatty qaıta óńdeýshiler qaýymdastyǵynyń basqarma tóraǵasy Batyrbek Áýbákirov jáne Májilis depýtattary qatysty. Bir aıta keterligi, estafeta «Jasyl damý», «QazAvtoJol» UQ» aksıonerlik qoǵamdarynyń qoldaýymen ótkizildi. Aksııa barysynda kúre joldyń qos qaptaly, janamalaı ornalasqan avtoturaqtar men kempıngterdiń mańaıy kúl-qoqystan tazalandy. Jumys barysynda áýeden barlaý da júrgizildi. Barlaý barysynda kózden tasa qalǵan zańsyz qoqys oryndary da anyqtaldy. Jınalǵan qoqys qaptarǵa salynyp, kólikke artylyp, zańdy polıgondarǵa jetkizildi.
–Týǵan jerdiń topyraǵy, onyń tazalyǵy, sáýleti men saltanaty eń aldymen el úshin kerek. Memleket basshysy Qasym-Jomart Toqaev bul máseleni jalpyulttyq deńgeıge kóterip otyr, – dedi «Amanat» partııasynyń atqarýshy hatshysy Dáýlet Káribek, – tazalyq pen tártip ómir súrý qaǵıdasyna aınalýy kerek. Bul jumys barsha qoǵamdy biriktiredi. Zamandastarymyzdyń boıynda ekologııalyq mádenıet pen sanany qalyptastyrady.
Aıtsa aıtqandaı, el men jerdiń janashyrlary tazalyq jumystaryn júrgizip qana qoımaı, jol boıyndaǵy eldi mekenderdiń turǵyndarymen júzdesý barysynda osy istiń máni men mańyzyn aıtyp, adamdardyń qaı kezde de tabıǵatqa janashyrlyqpen qaraýy kerek ekendigin eske salýdy da umytqan joq. О́kpek jolaýshylar kúre joldyń qos qaptalyndaǵy qaınaǵan jumysty kórip, tazalyqty ózderi de saqtaý kerek ekendigin túısinetin bolady.
Kópshilik qaýymdasa kirisse alynbas asý bar ma? Jaqsy iske jumylǵan jeti kúnniń ishinde partııanyń belsendileri men «Jastar rýhy» jastar qanatynyń eriktileri Aqmola, Qaraǵanda, Jambyl jáne Almaty oblystary arqyly ótetin, uzyndyǵy 1200 shaqyrymnan asatyn tas joldyń qos qaptalyn muntazdaı etip tazalap shyqpaq. Bir aıta keterligi, ilkimdi is-sharaǵa «1 komanda – 1 oblys» qaǵıdaty boıynsha qurylǵan komandalar qatysady. Onyń quramyna Májilis jáne ártúrli deńgeıdegi máslıhat depýtattary kiredi. Irgeles eldi mekenderdiń jalyndy jastarymen júzdesip, azamattarmen qoǵamdyq qabyldaý da uıymdastyrylmaq. Estafetanyń jabylý saltanaty Qonaev qalasynda ótkizilmek.
Osy arada «Amanat» partııasy Prezıdenttiń «Taza Qazaqstan» jalpyulttyq bastamasy aıasynda ár apta saıyn ótkiziletin «Taza beısenbi» ekologııalyq aksııasyn bastaǵan bolatyn. Aýqymdy jumysqa kiriserdiń aldynda elimizdegi jol boıyndaǵy aýmaqtardan, ónerkásiptik aımaqtardan, basqa da kóptegen jerden tazartylýǵa tıisti 475 jer telimi anyqtaldy. Sóz arasynda kóktemgi qyzyl sýdyń beti qaıtqannan keıin partııanyń tórt myńǵa jýyq belsendisi men «Jastar rýhy» jastar qanatynyń eriktileri tasqynnyń taqsyretin tartqan turǵyndardyń baspanasyn retke keltirýge qolushyn bergendigin aıta ketýimiz kerek. Elimizdiń barlyq óńirindegi saıabaqtardy, aýlalardy tazartyp, tarıhı-mádenı eskertkishterdiń mańaıy retke keltirildi.
Jalpy, eldi eleńdetken ekologııalyq máselelerdi sheshý partııanyń saılaýaldy baǵdarlamasynda qamtylǵan mańyzdy basymdyqtyń biri. Ýáde údesinen shyǵýdy murat tutqan partııa músheleriniń qajyrly qaıratynyń arqasynda 302,7 mıllıon túp aǵash egildi. Birer jyldan soń osy bir jan súısinter jaqsy istiń nátıjesi retinde ıt tumsyǵy ótpeıtin qalyń orman qaýlaı ósip, jarqyraı jaınap tursa, tazalyq pen tártipti kóksegen el yqylasynyń jemisi dep súısinýge bolady. Qyryqqa jýyq iri ónerkásip oryndarynda aýa tazalyǵyn baqylaıtyn avtomattandyrylǵan júıe ornatyldy. Bul da eldi eleńdetip otyrǵan mańyzdy máseleniń biri. 2027 jylǵa qaraı partııanyń saılaýaldy baǵdarlamasy aıasynda turmystyq qatty qaldyqtardy qaıta óńdeý men kádege jaratý úlesi 36 paıyzǵa jetpek. Jaıyq ózeniniń jaǵasynda ekojúıe qalpyna keltirilip, Balqash kóline turaqty sý aǵyny qamtamasyz etilmek. Qazir jumys istep turǵan 169 sýqoımasyn qaıtadan jańǵyrtyp, jańadan 14 sýqoımasyn salý mejelenip jatyr.
Igi bastamanyń arqasynda kórkem tabıǵattyń aı júzindegi kireýke alynyp, aq jaýynnan keıingi atyraptaı jaınaı túspek. Osynyń bári el men jerdiń qamyn oılaǵan janashyrlyqtyń jandy kórinisi.
Aqmola oblysy,
Arshaly aýdany
