Shyn júrekten shyqqan sóz

Elbasy Nursultan Nazarbaevtyń atyna Astana qalasynyń turǵyny Aıatbek Toqymbekovten hat keldi, dep habarlady Prezıdenttiń baspasóz qyzmeti. Qazaq handyǵynyń 550 jyldyǵyn respýblıka deńgeıinde atap ótý týraly Memleket basshysynyń bastamasymen qabyldanǵan sheshim halyq arasynda zor serpilis týdyryp, úlken yqylas pen qoldaýǵa ıe bolýda. Mysaly, Astana qalasynyń turǵyny Aıatbek Toqymbekov Qazaq handyǵynyń 550 jyldyǵyn atap ótý aıbyndy handarymyz men batyr-bılerimizdiń aldyndaǵy qasıetti paryzymyzdy óteý bolyp sanalatynyn jaza kelip, sol úshin Prezıdentke rahmet aıtady. Avtor óz hatynda Qazybek bıdiń: «Hannyń qaırany sheksiz, erdiń qaıraty sheksiz», degen danalyq sózine súıene otyryp, Qazaqstan Prezıdentiniń de qaırany sheksiz ekendigine kózi jetkenin aıtady. Sonyń aıǵaǵy retinde onyń úsh birdeı ilkimdi isine nazar aýdarady. «Elbasymyzdyń nurly joly naryq zamanynda qazaq halqynyń aq joly, adastyrmaıtyn týra joly, baǵdarshamy boldy. Táýelsizdigimizdi saqtaýǵa jetelegen sara jolda nesheme asýlardan óttik, qıyndyqqa tirelgende aqyl taýyp, elimizdi álemdegi aldyńǵy qatarly 50 memlekettiń deńgeıine kóterdińiz», – deıdi hat ıesi. A.Toqymbekov, sondaı-aq, Elbasy memleket basqarý sheberligin kórsetip qana qoımaı, halyqaralyq dárejedegi ulttyq kadrlar shoǵyryn tárbıelep, qalyptastyrǵanyn da atap ótken. Sonymen qatar, ol Qazaqstannyń bul kúnde Alataý baýraıynda bir astanasy, Saryarqada bas elordasy bar ekendigine toqtalady. «Osynyń barlyǵy Elbasymyzdyń qaırany men erliginiń, batyrlyǵynyń sheksizdigi emes pe?!» – delingen hatta. Sońynda avtor Qazaqstan Prezıdentine zor densaýlyq jáne tabys tilegen.