QazUÝ Álem ýnıversıtetteri konsorsıýmyna múshe boldy

ASTANA. 17 qańtar. Ál-Farabı atyndaǵy Qazaq ulttyq ýnıversıteti Álem ýnıversıtetteri konsorsıýmynyń (WUC) tolyqqandy múshesi atanyp, óziniń joǵary bedeli men halyqaralyq talaptarǵa saı dárejesin taǵy bir dáleldep shyqty. Bul týraly ýnıversıtettiń resmı saıty habarlady. Álem ýnıversıtetteri konsorsıýmy álemniń jetekshi joǵarǵy oqý oryndary men ǵylym jáne  bilim berý salasyndaǵy halyqaralyq uıymdardy biriktiredi. Onyń mindeti adamzattyń mańyzdy máselelerin sheshýde ýnıversıtetterdiń rólin arttyrý, qoljetimdi jáne sapaly bilimdi jan-jaqty qoldaý, bilim berý júıelerin jetildirý bolyp tabylady. Ásirese, stýdentter áleýetin arttyrýǵa, olardyń teorııadan alǵan bilimderin is júzinde qoldanýyna erekshe kóńil bólinedi. Aıta keterligi, ár memleketten tek bir ǵana ýnıversıtet WUC múshesi bola alady. Ál-Farabı atyndaǵy QazUÝ – osyndaı jahandyq halyqaralyq bilim berý qaýymdastyǵyna múshe bolý mártebesine ıe bolǵan Orta Azııadaǵy alǵashqy jáne jalǵyz ýnıversıtet. Ol sońǵy jyldary JOO jetekshi reıtıngterinde qarqynmen alǵa jyljýda, halyqaralyq yntymaqtastyqty keńeıte otyryp, álemdik deńgeıdegi forýmdar men konferensııalar ótkizýde. WUC múshesi bola otyryp, QazUÝ endi álemniń ataqty joǵarǵy oqý oryndarynyń ǵana emes, Búkilálemdik óner jáne ǵylym akademııasy, Halyqaralyq Jasyl Krest, Halyqaralyq ýnıversıtet prezıdentteriniń assosıasııasy, Mádenı dıplomatııa ınstıtýty, Aleksandrııa kitaphanasy jáne basqa da bedeldi uıymdardyń áriptesi bolyp tabylady. Bul álemde Qazaqstannyń joǵary bilim berý júıesiniń ımıdji men básekege qabilettiligin kóterýge sózsiz yqpal etedi. Aıdar О́risbaev. Derek: kaznu.kz. Sýret: gazeta.kz.