Foto: Úkimettiń baspasóz qyzmeti
Qanat Bozymbaev aqtóbelikterge tabandylyq pen shydamdylyq tanytqany úshin, sondaı-aq Memleket basshysynyń úndeýin qoldaǵan kásipkerlerge alǵysyn bildirdi.
Oblys boıynsha barlyǵy 4691 úı zardap shekken, onyń 992-si apattyq dep tanylǵan. 3095 úı jóndeýge keledi, 475 úı men páter satyp alynady jáne taǵy 517 úı salynbaq. Turǵyn úıdi satyp alý jáne salý shyǵyndarynyń basym bóligin demeýshiler men mesenattar óteıdi.
Aqtóbe oblysy ákimi Ashat Shaharovtyń aıtýynsha, «Qamqor-Aqtóbe 2024» qoǵamdyq qory Oıyl aýdanynda 175, Yrǵyz aýdanynda 134 úı salady. Qobda aýdanynda 147 turǵyn úıdi Bolat О́temuratov atyndaǵy qor salyp jatyr. Temir aýdanynda taǵy 21 turǵyn úı «Qazaqstan halqyna» qoǵamdyq qorynyń qarajatyna salynyp jatyr. BI Group kompanııasy Áıteke bı aýdanynda 26, Muǵaljar aýdanynda 14 úı salady.
Eurasian Resources Group kompanııalar toby men «Qamqor-Aqtóbe 2024» qoǵamdyq qory zardap shekkenderge baspana satyp alýǵa daıyn ekendikterin bildirdi. Búginde olardyń ókilderi 31 otbasyna páter kiltterin tabystady.
«Búgingi kún biz úshin erekshe este qalmaq. Úsh aı buryn bizdi evakýasııalaǵanda, taǵdyrymyz odan ári qalaı bolaryn bilmedik. Búgin bizge qala ortalyǵynan páter berilip jatyr. Mundaı qýanyshqa qalaı senerimdi bilmeı turmyn. Qıyn kezde qol ushyn sozyp, demeý bolǵan jandarǵa alǵysymyz sheksiz», dep aqtóbelik Nurlan Bektasov óz qýanyshymen bólisti.
Oblys ákimdigine 1000-ǵa jýyq otbasyn qonystandyrý kerek. Vıse-premer qurylys qarqynyn jedeldetýdi tapsyrdy.
«Kóp jumys bar, keıbir aýdandarda qosymsha jumys kúshi men tehnıkany eki esege arttyrý qajet. Turǵyn úıdi qalpyna keltirý máselesi Prezıdenttiń jeke baqylaýynda tur», dep atap ótti vıse-premer.
Sý tasqynynan zardap shekkender úshin salynyp jatqan turǵyn úılerdi merdiger uıymdar jaz mezgiliniń sońyna deıin tapsyrýǵa tıis. Qurylys barysyn Aqtóbe oblysy ákimdiginiń resmı saıtynda onlaın rejımde baqylaýǵa bolady.
