Foto: ru.freepik.com
- Qurlyqtyq hokkeı lıgasynyń (QHL) 2024/25 jyldardaǵy maýsymynyń kestesi jarııalandy. Turaqty birinshilikti «Barys» Astanada bastaıdy. Devıd Nemırovskı baptaıtyn komanda 4 qyrkúıekte «Neftehımıkpen» kezdesse, odan keıin «Traktor» (6 qyrkúıek) jáne «Amýrmen» (9 qyrkúıek) sheberlik baıqasady.
- Grekııanyń Patry qalasynda mýaı-taıdan álem chempıonaty óz máresine jetti. 70 elden kelgen 800-den asa sportshylardyń basyn qosqan baıraqty básekede elimizdiń erler quramasy úsh júlde jeńip aldy. Tarqatyp aıtsaq, 57 kg salmaqta Shámil Ermaǵambetovke teń keler eshkim tabylmady. Fınalda ol reseılik Salavat Isaevqa san soqtyrdy. 63,5 kg salmaq dárejesinde Ábil Ǵalıev altyn tuǵyrǵa kóterildi. Fınaldyq aıqasta qazaq sportshysy vetnamdyq Ngýen Doan Longtyń osal tusyn ońaı tapty. Al Almas Sársembekov kúmis medaldy ıelendi. Sheshýshi tusta qandasymyz Reseıdiń taǵy bir ókili Majıd Temaevqa ese jiberdi.
- Ońtústik Koreıada jeńil atletıkanyń keıbir túrleri boıynsha Azııa chempıonaty aıaqtaldy. Bul jarysta bes jerlesimiz óner kórsetkenimen, olardyń birde-bireýi júldeli orynǵa ilige almady. Eń úzdik kórsetkishke Ivan Ivanov qol jetkizdi. Ol ıadro laqtyrýdan tórtinshi orynǵa taban tiredi.
- Slovenııanyń astanasy Lıýblıanada ústel tennısinen ótip jatqan WTT Star Contender týrnırinde Kırıll Gerasımenko 1/8 fınalda súrindi. Alǵashynda ol asa tartysty básekelerde horvatııalyq Fran Koıch pen Eýropa birinshiliginiń kúmis júldegeri, slovenııalyq Darko Iorgıchten 3:2 esepterimen basym tústi. Biraq odan keıin Olımpııa oıyndarynyń alty dúrkin júldegeri, Eýropanyń birneshe dúrkin chempıony, Álem kýboginiń ıegeri, germanııalyq Dmıtrıı Ovcharovtan utyldy.
- Fýtboldan Qazaqstan Premer-lıgasynyń 11 týrynda mynadaı nátıjeler tirkeldi: «Shahter» – «Atyraý» 0:3, «Tobyl» – «Qaırat» 1:0, «Qaısar» – «Turan» 1:1, «Jetisý» – «Jeńis» 2:2, «Elimaı» – «Aqtóbe» 2:2 jáne «Astana» – «Ordabasy» 0:1.
- Túrkııanyń Antalıa qalasynda sadaq atýdan Olımpııa oıyndarynyń sońǵy lısenzııalyq týrnıri ótti. О́kinishke qaraı, Qazaqstannyń áıelder quramasy úshin bul jarys sátsiz aıaqtaldy. Anadoly eline sapar shekken eki mergenimiz ǵana 1/8 fınalǵa shyqty. Sol mejede Alına Ilııasova slovakııalyq Denısa Barankovadan utylsa, Elızaveta Avdeeva ırandyq Mobını Fallaǵa jol berdi.
- 22-30 maýsym aralyǵynda Iordanııada kúres túrlerinen jasóspirimder arasyndaǵy (U-17) Azııa birinshiliginiń shymyldyǵy túriledi. Qazaqstan quramasynyń aǵa jattyqtyrýshysy Almat Kebisbaev atalǵan dodada myna shákirtterine senim artyp otyr: 45 kg – Nurdáýlet Qumaruly , 48 kg – Zarap Suńqar, 51 kg – Edige Tóleýtaev, 55 kg – Alpamys Bolatuly, 60 kg – Shámil Dosbol, 65 kg – Danııar Qanaǵatbek, 71 kg – Ábilmansur Aqylbek, 80 kg – Erkebulan Anapııa, 92 kg – Ádilet Toıshybek jáne 110 kg – Aıdos Qaıratov.
- Chehııanyń Brno qalasynda kórkem gımnastıkadan Gran-prı serııasynyń sońǵy kezeńi óz máresine jetti. Bul jarysta jerlesterimizdiń arasynan jalǵyz Aıbota Ertaıqyzy óner kórsetti. Kópsaıystyń qorytyndysy boıynsha ol jetinshi oryn alsa, jattyǵýdyń úsh túri boıynsha fınalǵa shyqty. Biraq sol básekelerdiń birde-bireýinde jeńis tuǵyryna kóterile almady. Aqbotanyń nátıjesi mynadaı: «Dop» - tórtinshi, «taspa» – besinshi jáne «urshyq» – jetinshi oryn.
