Foto: muftyat.kz
Mıssııadaǵy dárigerler tobynyń jetekshisi Ardaq Aıtbaıulynyń aıtýynsha, medısınalyq ortalyq kómegine maýsymnyń 14-16 kúnderi 703 qajy júgingen. Olardyń qatarynda júrek-qan tamyrlary, joǵary jáne tómen tynys, asqazan-ishek aýrýlary, sondaı-aq basqa da (mazol jaraqaty, allergııa, konıýnktıvıt, t.b.) syrqat boıynsha 120 qajy birneshe ret tekserilgen.
«15 maýsymda Muzdalıfada qan qysymy kóterilgen qajyǵa jedel alǵashqy kómek kórsetilip, dárigerdiń baqylaýymen qonaqúıge jóneltildi. 16 maýsymda Mına jazyǵynda tranzıtorlyq ıshemııalyq ustama boıynsha bir qajyǵa alǵashqy medısınalyq kómek kórsetilip, stasıonarǵa jatqyzyldy. Jamaratta shaıtanǵa tas laqtyryp kele jatqan jolda qanty tómendep, esinen tanyp jatqan áıel adamǵa tez arada kómek kórsetilip, ol da stasıonarǵa jetkizildi», dedi A.Aıtbaıuly.
Qazirgi ýaqytta atalǵan naýqastar dárigerlerdiń tolyq baqylaýynda, jaǵdaılary birqalypty. Odan bólek, elden jetkizilgen dári-dármek qory da jetkilikti.
Qazaqstan qajylyq mıssııasy Mekkede otandastarymyz aman ekenin habarlady.
