Foto:inbusiness.kz
«Temirtaý jastary» turǵyn úı-ıpotekalyq baǵdarlamasyna ótinish 28 maýsymǵa deıin qabyldanady.
Baǵdarlamaǵa 35 jasqa deıingi azamattar qatysa alady.
Sondaı-aq ıpoteka alýǵa nıetti turǵynnyń jáne onyń otbasy músheleriniń menshiginde sońǵy 5 jyl ishinde jyljymaıtyn múlik bolmaýy kerek.
Ipotekalyq qaryzdyń eń joǵary somasy - 15 mln teńge.
Úmitkerlerdiń esepshotynda qaryz somasynyń keminde 10% mólsherinde bastapqy jarnasy jınalýy shart.
Osy talaptar oryndalǵan jaǵdaıda turǵyn úıdi jyldyq 6%-ben resimdeýge bolady.
Nesıe merzimi - 8 jyl.
Baǵdarlamaǵa densaýlyq saqtaý, bilim berý, mádenıet, sport júıeleriniń qyzmetkerlerinen, BAQ, óndiris, JOO jáne áleýmettik sala ókilderinen basqa kvazımemlekettik sektordyń kommýnaldyq kásiporyndarynyń, TJM, jolaýshylar kólik kásiporyndarynyń, «Oqjetpes-T» jáne «Qazposhta» kompanııalarynyń qyzmetkerleri de qatysa alady.
Turǵyn úıdi bastapqy jáne qaıtalama jyljymaıtyn múlik naryǵynda satyp alý qarastyrylady.
Úmitkerlerden mynadaı qujattar suralady:
- jeke kýálik;
- azamattyq hal-ahýaldy memlekettik tirkeý týraly kýálik (neke qııý jáne balalardyń týýy týraly kýálik – bolǵan jaǵdaıda);
- ótinish berýshige jáne otbasynyń barlyq múshelerine jyljymaıtyn múliktiń joqtyǵy týraly anyqtama;
- resmı blankide jumys ornynan anyqtama (resmı blank bolmaǵan jaǵdaıda anyqtamada uıymnyń móri bolýy tıis);
- eńbek ótilin rastaıtyn qujat;
- eńbek qyzmetiniń barlyq kezeńi úshin zeınetaqy aýdarymdary týraly úzindi kóshirme;
- múgedektik týraly anyqtama (bar bolsa).
Aıta keteıik, «Temirtaý jastary» - Temirtaý qalasy ákimdigi men «Otbasy banktiń» birlesken jobasy. Turǵyn úı-ıpotekalyq baǵdarlama 2023 jyly iske qosyldy.
