Qalanyń Alashahan dańǵyly boıyndaǵy paıdalanýǵa jańa berilgen 34 A úıdiń turǵyndaryna páter kiltin tabystaýǵa oblys ákimi Berik Ábdiǵalıuly men oblystyq máslıhat tóraǵasy Baýyrjan Shyńǵysov arnaıy keldi.
Jańa páterlerdiń 13-i kópbalaly otbasylarǵa, 15-i jetim, ata-ana qamqorlyǵynsyz qalǵan balalarǵa, 32-si halyqtyń áleýmettik jaǵynan osal toptaryna jatatyn azamattarǵa berildi.
Saltanatty sátte oblys basshysy Jezqazǵan qalasynda bıyl 270 páter paıdalanýǵa beriletinin málimdep, jalpy oblys boıynsha turǵyn úı qurylysy qarqyn alǵanyn qýana jetkizdi.
«Qazirgi kezde oblystyń barlyq óńirin qosa eseptegende 36 myń sharshy metrge jýyq turǵyn úıdiń qurylysy júrýde. Bul – 400-ge jýyq baspana degen sóz. Árıne, kezekte turǵandar sany barshylyq. Sondyqtan bizdiń mindetimiz – turǵyn úı qurylysynyń barynsha qarqyndy júrgizilýine qolaıly jaǵdaı týdyrý», dedi oblys ákimi.
Páter kiltin alǵandardyń biri kópbalaly ana Janat Esetova edi.
«Biz kópten bergi armanymyzǵa qol jetkizdik. Osyndaı istiń basy-qasynda júrgen barsha azamattarǵa alǵysymyz sheksiz», dedi Janat Fermebaıqyzy qýanyshyn jasyra almaı.
Bir kúnde 60 páterdiń kilti tapsyrylǵan jaǵdaı Jezqazǵanda kópten beri bola qoımaǵan oqıǵa edi. Halyqtyń erekshe qýanyshqa kenelgeni de sondyqtan. Bul jańa oblystyń erteńine degen senimdi nyǵaıta túskeni anyq.
Jezqazǵan
