Aýmaǵyna 15 aýyl ákimdigi, 28 eldi meken kiretin irgeli aýdannyń polısııa bóliminde 16 jylǵa jýyq qyraǵylyq, tabandylyq tanytyp kele jatqan polısııa maıory Azamat Asqaruly basshylyq jasaıtyn bólimshege kámeletke tolmaǵandar qaýipsizdigi boıynsha ınspektorlardy, patrýldi polıseılerdi, baqylaý qyzmetin, ýchaskelik ınspektorlardy, ıývenaldy polısııa ınspektorlaryn, áıelderge zorlyq-zombylyq kórsetýge qarsy ınspektorlardy, sondaı-aq tabıǵatty qorǵaý ınspektorlarynyń qyzmetin qadaǵalap, júıeli jumys isteýin uıymdastyrý mindeti júktelgen. Osyndaı san salaly jaýapty qyzmetti tizgindep júrgen Azamat Abrahmanov ujymǵa ǵana emes, oblystyń quqyq salasynda utqyr uıymdastyrýshy, bilikti basshy retinde tanylyp, isimen úlgi-ónege bolyp júr.
«Aýdanymyzda egin, mal sharýashylyǵymen qatar balyq jáne ań aýlaý kásibi jaqsy damyǵan. Alaıda kóldeneń tabys tabýda quqyq buzýshylyqtar bolmaı qoımaıdy. Osy sebepti kóbine qylmystyń aldyn alý jumystaryn júrgizemiz. Arnaıy jıyndar ótkizip, eskertpe-nusqaýlyqtar taratamyz. Jergilikti basqarý organdarymen, Tótenshe jaǵdaılar bólimshelerimen birigip, judyryqtaı jumyla jumys isteımiz. Eriktiler tobynyń da belsendilik tanytatyn kezderi óte kóp», deıdi Azamat Asqaruly.
Polısııa maıorynyń aıtýynsha, qylmys pen buzaqylyqtyń aldyn alýda aýyldardaǵy adam aıaǵy úzilmeıtin dúken men kafelerge, memlekettik mekemelerge baqylaý kameralary qoıylǵan. Sonymen qatar aýdannyń ortalyq kóshelerine, aýyldarǵa «Sergek» baqylaý kameralary ornatylǵan. Bıyl aýdanda baqylaý kamerasynyń sanyn 800-ge jetkizý josparlanyp otyr.
«Osy kameralarǵa túsken beınejazbanyń arqasynda zań buzýshyny tez quryqtaý múmkindigi artty. Sondaı-aq kameradan seskenip, zańǵa qaıshy áreket jasaýshylardyń qatary azaıdy. Burynǵy jyldarmen salystyrǵanda qylmystyq kórsetkish ájeptáýir kemigendigi qýantady. Jaz bastalǵaly Balqash kóli men Ile ózenine demalýshylar qatary kóbeıip keledi. Bul maýsymda polısııa qyzmetkerleri tynym tappaıdy. Biz týrıster men saıahatshylardyń zań buzbaýyn, qaýipsizdik erejelerin eskerýin qatań qadaǵalap otyramyz», degen bólimshe basshysy tyıym salynǵan kezeńde balyq aýlap, ań-qus atatyn brakonerlerdiń de qarasy eselene túsetindigin tilge tıek etti.
«Qyzyl kitapqa» engen ań-qustardy atýǵa zań júzinde qatań tyıym salynǵandyǵyn elep-eskermeıtinder jıi kezdesedi. Osy sebepti olardyń qolyndaǵy myltyqtyń tirkelgen-tirkelmegendigi tekseriledi. Balyqty belgili bir aýmaqta qoldan jasalǵan apparattyń kómegimen toq soqqyzyp aýlaıtyndar da bar. Mundaı zańsyzdyqqa barǵan brakonerlerdi san márte quryqtap, zań júzinde jazalandy», dedi.
Polısııa maıory Azamat Asqaruly qoǵamdyq tártipti qamtamasyz etýde bilikti basshy ǵana emes, 9 qyzdy aıalap ósirip otyrǵan kópbalaly áke ekendigin aıryqsha ataǵanymyz abzal. Shańyraǵynyń shyraıyn kirgizip, mańdaıyna baq darytyp, júregine meıirim uıalatqan asyl jary Jazıra Menketaıqyzymen qol ustasyp, otaý qurǵaly 17 jylǵa jýyqtaǵan. Osy ýaqyt aralyǵynda gúldeı úlbiregen qyzdary birinen soń biri dúnıege kelip, qýanyshtaryn eselep keledi.
Qyr qyzǵaldaǵyndaı jaıqalyp, ósip kele jatqan qyzdarynyń úlkeni Aqnur búginde 9-synypty támamdasa, ekinshisi Gúlnur osy synypqa kóshti. Al Káýsar men Jasmın – bastaýysh synyp oqýshylary. Olardyń izinen ilesken Aıarý men Tomırıs mektep tabaldyryǵyn attaýǵa taıaý. Al erekshe qurmetke ıe egiz qyzdary Adına men Medına eki jastan endi assa, qyzdardyń eń kishkentaıy Daıana on aıǵa toldy. Buıyrtsa, 9 qyzdyń qatary taǵy bir nárestemen tolyǵyp, juby jarasqan Azamat Abdrahmanov pen Jazıra Malgejdarova on balanyń ata-anasy atanady. Baq daryǵan Balqash aýdanynda erekshe otbasy sanalatyn Abdrahmanovtyń qyzdary osy bastan ónerli bop ósip keledi. Olardyń qatarynda áke jolyn qýyp, quqyq qorǵaý qyzmetkeri bolýdy armandaıtyndary da joq emes.
«Qyzdarymyzdy bir-birinen bólip jarmaımyz. Olardyń barlyǵy talantty, aqyldy ári ádemi. Tólbasy Aqnurymyz sabaqty úzdik oqýmen qatar aǵylshyn tilin jetik meńgerip keledi. Al Gúlnurymyz sýret ónerine óte beıim. Bizdiń qyzmette fotorobot jasaıtyn arnaıy mamandar bar. Qyzymnyń boıyna sol qasıet daryǵan sııaqty, kez kelgen zatty ne jan-janýardy beınelep aıtsam boldy, aınytpaı salyp beredi. Úlken eki qyzym óskende jolymdy jalǵap, quqyq qorǵaý salasynda qyzmet etkisi keletindigin jıi aıtady. Men qyzdarymnyń bul tańdaýyn qýana quptaımyn. Sebebi táýelsiz elimizdiń tynyshtyǵyn qamtamasyz etýmen qatar quqyqtyq memleket bolyp qalyptasýyna ózindik úlesterin qossa, nege qýanbasqa? Sondyqtan qyzdarymyzdyń uıada jaqsy tálim-tárbıe sińirip, mektepte tereń bilim alyp, qalaǵan mamandyqtarynyń ıesi bolýyna anasy ekeýmiz bar múmkindigimizdi jumyldyrýdamyz», deıdi maıor shenindegi 9 qyzdyń ákesi Azamat Abdrahmanov.
Qyzmetine qyraǵy, ujymda tájirıbeli, bilikti basshy bola bilgen polısııa qyzmetkerin aýdan jurtshylyǵymen qatar áriptesteri de árkez qurmet tutady. «Azamat Asqaruly jumysyna óte tııanaqty. Ol – otbasyna ǵana emes, aýdanymyzǵa úlgili áke. Toǵyz balany ósire otyryp, jumysyna zor jaýapkershilikpen qaraıdy. Bilikti maman retinde qylmystyq isterdi ashýda da belsendilik tanytyp, ortasynyń qurmetine bólenip júredi», deıdi Balqash aýdandyq polısııa bóliminiń basshysy, polısııa podpolkovnıgi Aıdar Omarov.
Otbasy qundylyǵyn qunttap, quqyqtyq qyzmette de qyraǵylyq tanytyp júrgen Azamat Asqaruly qoly qalt ete qalsa, kózqýanyshyna aınalǵan qyzǵaldaqtaryn óbektep, solardyń janynan tabylýǵa tyrysady. О́ıtkeni jumysyna erte ketip, kesh qaıtatyn ákeniń jolyn kútip, moınyna oralatyn qyzdarynyń qylyqtary táp-tátti. Qyrmyzy gúldeı jaınaǵan qyzdaryn kórgende qýanyp, shattanyp, sharshaǵanyn da umytyp qalatyn polısııa maıorynyń bar tilegi – elimizdiń tynyshtyǵy men balalardyń zorlyq-zombylyqsyz baqytty ómir súrýi. Osy jolda jan-tánimen antyna adal qyzmet etýdi óziniń aınymas muraty sanaıdy.
Almaty oblysy
