Kznews.kz málimdegendeı, Nurǵısa Tilendıev pen Darıǵa Tilendikelini 1967 jyly Almatydaǵy kınostýdııada tanysqan eken. Sol sátte 42 jastaǵy aty áıgili mýzykant 19 jastaǵy órimdeı qyzdy birden unatyp, sezimin bildirgen. Kópshilikke tanymal «Kýá bol» áni – kompozıtordyń súıgen jaryna arnaǵan eń alǵashqy týyndysy.
«Biz kınostýdııada jumys istep júrgen kezde Lenıngradtan óner adamdary Qazaqstanǵa keletin boldy. Soǵan biz daıyndaldyq, kelgen soń Medeýdiń basynda kúttik. Sodan keıin bári úıine qaıtyp ketti. Tek men jáne Nurǵısa aǵa júr. Ol ýaqytta men ol kisini «aǵa» deımin. Sóıtsek Nuraǵa ony ózi bárimen aqyldasyp, osylaı josparlapty. Menimen sol kúni jaqynyraq tanysyp, qasymda bolý úshin solaı jospar qurǵan. Ony men keıin estidim. Sol túni aı jap-jaryq, juldyzdar jymyńdap tur. Túngi saǵat 2-3-tiń kezi. Saryldap ózen aǵyp jatyr. Sol kezde Nuraǵa aspanǵa qarap áýen shyǵardy. Ol áýen «Kýá bol» áni edi. «Qaryndasym, men osy ándi saǵan arnaımyn» dedi. Men tańǵalyp qaldym. Sodan bir jyldan keıin Nuraǵań ekeýmiz úılendik. Sol tarıhty Tumanbaı Moldaǵalıevke sýrettep aıtyp berdik. Ol kisi basqa bólmege kirip ketti de, 5-10 mınýttyń ishinde sózin jazyp shyqty. Sodan keıin bizdiń jubymyz jazylǵan joq. Meni súıgen birinshi adam – Nuraǵań. Biraz jas aıyrmashylyǵy bar. Oǵan qaraǵan joqpyz», – deıdi Darıǵa Tilendikelini.
Nurǵısa Tilendıevtiń dúrkirep ótken úılený toıynda sol kezeńdegi qazaq óneriniń dúldúl maıtalmandarynyń bári bolǵan eken. Alaıda erli-zaıyptynyń otbasylyq ómirinde erekshe estelikter de bar, synaqqa toly sátter de joq emes. Olar uzaq ýaqyt sábı kútken.
«Iá, biz sábıdi uzaq kúttik, biraz em de aldyq. Danııar degen balany asyrap aldyq. Ol Nuraǵańnyń týysqan qaryndasynan týǵan. Ol qaryndasy kúıeýimen ajyrasyp ketti de, úsh aılyǵynda men sol balany baýyryma bastym. Danııar 1976 jyly týǵan bala. Men ony emizip edim, meıirlengenim sonshalyq meniń omyraýymnan sút shyǵyp ketti. Danııar ulym 9 jasqa tolǵanda 1985 jyly Dınara qyzym dúnıege keldi. 39 jasymda Dınara qyzymdy ózim týdym ǵoı. Nuraǵa Dınara ómirge kelgende qatty qýandy. Danııar balam óte áppaq, maǵan uqsaıtyn. Al 25 jasynda Danııar balamnan aıyrylyp qaldym, júregi toqtap qaldy», – deıdi kompozıtordyń jubaıy.
Sondaı-aq Nurǵısa Tilendıevtiń qazasy bul otbasy úshin ońaı bolǵan joq. 1998 jyly qazaqtyń mańdaıyna bitken ataqty kúıshi ómirden ozǵan edi. Darıǵa áje sol bir qıyn sátti de eske aldy.
«Men Nuraǵa jazylyp ketedi dep oıladym. Aýrýhanada bes aı jatty. Sol kezde «Halyq qaharmany» ataǵyn prezıdent Nazarbaev kelip keýdesine taqty. Sodan bir jarym aı ótken soń Nuraǵa qaıtys boldy. Onyń aldynda «Darıǵa, jaǵdaı óte qıyn. Esińde bolsyn, eger de bir jaǵdaı bolsa, bizdiń qazirgi otyrǵan páterimiz murajaı bolýy kerek» dedi. Sol sózin men basyma myqtap saqtap aldym. 2014 jyly sol úıdi mýzeıge tapsyrdyq. Ol kezde Almatynyń ákimi Ahmetjan Esimov edi. Nuraǵanyń syrqaty – baýyr aýrýy. Jaryqtyq sol baýyrdan ketti ǵoı. Tamaq ishpedi. О́ner adamdarynyń bári Nuraǵańnyń qasynda boldy. Orkestrdegi balalary aýrýhanada kezekshilikke turyp, Nuraǵanyń aıaq-qolyn ýqalap, qasynda otyrdy. О́te qıyn jaǵdaı boldy», – deıdi Tilendıevtiń mýzasy.
Búginde Darıǵa Tilendikelini Almaty qalasynda turady. Ol kisiniń endigi armany – qyzy Dınara men nemeresi Daıananyń qyzyǵyn kórý.
