Foto: Májilis
Aldymen Palata spıkeri «Parlament sózi» syılyǵynyń jeńimpazdary men barsha buqaralyq aqparat quraldary ókilderin kásibı merekemen quttyqtady.
– Sońǵy jyldary jýrnalısterdiń qyzmetin, sóz bostandyǵyn qamtamasyz etý jolynda kóp sharýa atqarylyp jatyr. Memleket basshysy Qasym-Jomart Kemeluly Toqaevtyń júrgizip otyrǵan saıasatynyń negizgi ózegi de sol. Sonyń birden-bir kórinisi – osy Májilis alańy. Búgingi tańda BAQ – bul aqparatty halyqqa jetkizýdiń eń mańyzdy, obektıvti jáne jedel arnasy. Al jýrnalıster qaýymyn depýtattardyń eldi damytý jolyndaǵy naǵyz odaqtastary deýge bolady, – dedi Palata spıkeri.
Erlan Qoshanov Prezıdenttiń tapsyrmasy boıynsha ázirlengen «Mass-medıa týraly» jańa zańdy depýtattar jýrnalıstermen birge jazǵanyn jáne olardyń kóptegen usynys-pikirin eskergenin atap ótti. Jańa zań buqaralyq aqparat quraldarynyń múddelerin qorǵaıdy jáne otandyq medıa salasyn jetildirýge mol múmkindik beredi. Onyń jumysyna jýrnalıster arasynan shyqqan eń belsendi depýtattar qatysty. Olar árqashan óz áriptesterimen baılanysta jáne Májilistiń ashyqtyǵy úshin kóp jumys isteıdi.
Caltanatty jıynda «Úzdik baspa jarııalanymy úshin» nomınasııasymen «Túrkistan» gazetiniń bas redaktory Babajanuly Baýyrjan, «Iýrıdıcheskaıa gazeta» basylymynyń tilshisi Saktaganova Lınara Boryevna marapataldy.
«Úzdik televızııalyq sıýjet úshin» nomınasııasy boıynsha «Habar» telearnasynyń tilshisi Alına Rashıtovna, «Almaty» teleradıokompanııasynyń jýrnalısi Anýarbek О́mir Serikbekuly, «Eýrazııa» birinshi arnasy» telearnasynyń tilshisi Qaınetden Janel Kenjebekqyzy úzdik dep tanyldy.
«Úzdik beıne-sýret materıaly úshin» nomınasııasy «Qazaqparat» halyqaralyq aqparat agenttiginiń fototilshisi Fedıýnın Vıktor Vladımırovıchke, «MIR» telearnasynyń teleoperatory Kýrakov Marat Kýbaıdýllovıchke tabystaldy.
«Úzdik ınternet jáne radıo materıaly úshin» nomınasııasyn «BAQ.KZ» aqparat agenttiginiń tilshisi Ramanqulova Gúljan Ábdikárimqyzy, «NS» radıosynan Begımbetov Erbol Meırhanuly, «BES.media» jelilik basylymynyń jýrnalısi Baımanov Damır Asqaruly aldy.
«Arnaıy reportaj» nomınasııasy boıynsha «24.kz» telearnasy «Májilis live» baǵdarlamasynyń júrgizýshisi Sholgına Anna Aleksandrovna, «Abai.live» Youtube arnasynyń júrgizýshi-redaktory Tlenshıev Abaı Seıfýllauly, «Zakon.kz» saıtynyń tilshisi Gýbenko Andreı Olegovıch marapattaldy.
«Parlamenttik jýrnalıstıkany damytýǵa qosqan úlesi úshin» nomınasııasynda «Qazaqstan» Ulttyq arnasy «Apta» baǵdarlamasynyń jetekshisi Jaksylyqova Jaına Slambekqyzy men «Vremıa» gazetiniń bas redaktory Tarakov Lev Iýrevıch jeńiske jetti.
Sondaı-aq «Parlament sózi» arnaıy syılyǵy nomınasııasy «Tengrinews.kz» jelilik basylymy men «Jibek joly» telearnasynyń ujymyna tabystaldy.
