Foto: gov.kz
- Andreı Tıýtın men Ádel Jeksenbınova juby sadaq atýdan Túrkııanyń Antalıa qalasynda ótken Álem kýboginiń kezeńdik saıysynda bas júldeni oljalady. Bastapqy básekelerde Brazılııa, Slovenııa, Italııa quramalarynan basym túsken jerlesterimiz fınalda Ulybrıtanııany utty.
- Fýtzaldan 2025 jyly jasóspirimder (U-19) arasyndaǵy Eýropa birinshiligi qaı jerde uıymdastyrylatyny bıyl qyrkúıekte ótedi dep josparlanǵan ÝEFA-nyń arnaıy kongresinde anyqtalady. Dop dodasyn qabyldaýǵa úmitkeler qatarynda Qazaqstan da bar.
- Qazaqtyń tanymal kásipqoı boksshysy Sultan Záýirbek (17-0, 12 KO) Ulybrıtanııanyń Bolton qalasynda uıymdastyrylǵan týrnırde Roman Rýben Reınosony (22-4-2, 10 KO) birinshi raýndta uryp jyǵyp, ekinshi jartylaı jeńil salmaqtaǵy WBA Continental nusqasynyń altyn belbeýin ıelendi.
- Fýtzaldan el chempıonatynyń qola júldegeri anyqtaldy. Bul ataqqa Rýdnyıdyń «Aıaty» qol jetkizdi. Úshinshi oryn úshin tartysta olar «Atyraýdan» aılasyn asyrdy. Al bas júldeni byltyr ǵana irgetasy qalanǵan «Semeı» klýby oljalasa, 20 jyl boıy qarsylas shaq keltirmegen Almatynyń «Qaıraty» bıyl kúmis medaldy qanaǵat tutty.
- Qazaqstannyń tennısshisi Iýlııa Pýtınseva Ulybrıtanııanyń Bırmıngem qalasynda ótken halyqaralyq týrnırdiń jeńimpazy atandy. Bastapqy básekelerde Klara Bıýrel (Fransııa), Angelına Kalınına (Ýkraına) jáne Kerolaın Doýlhaıdty (AQSh) utqan ol jartylaı fınalda Elızabetta Kochcharettony (Italııa) qapy qaldyrdy. Fınalda jerlesimiz Aıla Tomlıanovıchti (Aýstralııa) 6:1, 7:6 esebimen tize búktirdi.
- 14–18 tamyzda Astanada shaıbaly hokkeıden Prezıdent kýbogi jolyndaǵy jarystyń jalaýy jelbireıdi. Bıyl bul týrnırde «Barystan» bólek, Habarovskiniń «Amýr», Tolıattıdiń «Lada» klýbtary jáne Qazaqstannyń ulttyq quramasy sheberlik baıqasady.
- Iordanııanyń astanasy – Ammanda ótip jatqan jasóspirimder arasyndaǵy Azııa birinshiligin (U-17) Qazaqstannyń grek-rım kúresi sheberleri 1 altyn, 2 kúmis, 3 qolamen qorytyndylady. Jalǵyz bas júldeni 60 kg salmaqtaǵy Shámil Dosbol jeńip alsa, Anapııa Erkebulan (80 kg) men Ádilet Toıshy (92 kg) fınalda utyldy. Al Nurdáýlet Qumaruly (45 kg), Edige Tóleýtaev (51 kg) jáne Qanaǵatbek Danııar (65 kg) qola medalǵa qol jetkizdi.
- «Naıman» degen laqap esimdi tańdaǵan qazaqtyń tanymal sportshysy Qýat Hamıtov (24-9-1) Gleıson Tıbaýdy jekpe-jekke shaqyrdy. 40 jastaǵy Brazılııanyń faıteri (38-19) 2006–2018 jyldary UFC-de kúsh synasqan. Kezinde ol Nık Dıas (utyldy), Djım Mıller (utyldy), Rafaelý Olıveıra (utty), Rafael dýs Anjýs (utty), Habıb Nurmagomedov (utyldy), Tonı Fergıýson (utyldy), Islam Mahachev (utyldy), Ýıll Brýks (utty), Rodı Makdonald (utty) jáne taǵy basqa dúldúldermen aıqasqan.
- Qurlyqtyq hokkeı lıgasynda (QHL) kúsh synasatyn «Barys» bıylǵy chempıonat qarsańyndaǵy josparyn bólisti. Olar 15 shildede Astanada bas qosyp, oqý-jattyǵý jıynyn ótkizedi. Sodan keıin 14–18 tamyzda Astanadaǵy Prezıdent kýbogi men 20–25 tamyzda Ombydaǵy Blınov qýbogine qatysady. Bul dodada Iаroslavldiń «Lokomotıv», Novosibirdiń «Sıbır» jáne Chelıabiniń «Traktoryna» qarsy oınaıdy.
- Tennısshi Iýlııa Pýtınseva Ulybrıtanııadaǵy jeńisinen keıin áıelder arasyndaǵy álemdik reıtıngte birden jeti satyǵa joǵarylap, qazirgi kezde 34-oryndy ıelendi. Qazaqstannyń birinshi raketkasy Elena Rybakına WTA tizimindegi tórtinshi ornyn saqtap qaldy. Erler arasynda eń úzdik kórsetkish Aleksandr Býblıkke tıesili. О́tken aptamen salystyrǵanda ol úsh satyǵa tómendep, bul kúnderi 22-oryndy enshiledi. Al Aleksandr Shevchenko 58-orynǵa taban tiredi.
