Foto: www.trt.net.tr
Prezıdent bıyl «Taza Qazaqstan» aýqymdy ekologııalyq aksııasyna júzdegen myń adam qatysyp, ondaǵan myń tonna qoqys jınalǵanyn tilge tıek etti.
«Bul aksııa turaqty túrde jalǵasady. Aýlalarymyz ben kóshelerimizdegi, saıabaqtar men qoryqtardaǵy, ózen-kólderdegi tazalyq pen tártiptiń saqtalýy barsha azamatqa tikeleı baılanysty. Biz qoǵam retinde aınalamyzdaǵy tazalyqtyń qadirin bilip, basqa adamdardyń eńbegin qurmetteýdi úırenýimiz kerek», dedi Qasym-Jomart Kemeluly.
Memleket basshysynyń aıtýynsha, otandyq medıa qoǵamda joǵary ekologııalyq sana men tabıǵatty aıalaý mádenıetin qalyptastyrýǵa zor kómegin tıgize alady.
«Osy oraıda azamattarymyzdyń el ishindegi, sondaı-aq sheteldegi qoǵamdyq oryndarda vandalızmmen kózge túsip, turpaıy minez-qulyq kórsetýi – nazar aýdaratyn másele. Tarıhı-mádenı muralarǵa zııan keltirý, eskertkishterdi qorlaý sııaqty keleńsiz áreketter tek zańmen ǵana jazalanyp qoımaı, qoǵam tarapynan da aıyptalýǵa tıis. Bul oraıda buqaralyq aqparat quraldarynyń róli asa mańyzdy», dep qosty Prezıdent.
Jıyn barysynda Memleket basshysy taǵy bir másele - Ulttyq dombyra kúnin dáripteý týraly sóz qozǵady.
«Aldymyzda «Ulttyq dombyra kúni» kele jatyr. Dombyra – qazaqtyń jany, ult bolmysynyń aınasy. «Naǵyz qazaq qazaq emes, naǵyz qazaq – dombyra». Biz ulttyq biregeıligimizdi saqtaǵymyz kelse, qasterli aspapty qadir tutýymyz qajet. Ol – bizdiń tereńnen tamyr tartatyn tól tarıhymyzdyń kýágeri. Mereıli mereke ónerimizdi órge shyǵaryp, tutastyǵymyzdy nyǵaıta túsý úshin kerek. Men ulttyq qundylyqty ulyqtaıtyn bastamalardy barynsha dáripteý qajet dep sanaımyn. Dombyra kúni sonyń aıqyn kórinisi bolýǵa tıis», dep túıindedi Qasym-Jomart Kemeluly.
