Jolaýshy Álııa Moldaǵulovanyń sózinshe, olar "Eır Astananyń” 216 reısimen Antalııadan saǵat 12:20-da keshigip ushqan. Sosyn bir saǵat ushyp, keri qaıtqan eken.
- Olar ushaqtyń buzylǵanyn habarlady. Dárethana biz ushqannan bastap jumys istemedi. Olar bizdi keminde taǵy bir jarym saǵat ushaqta ustady. Sodan keıin túsirip, júkterimizdi alýymyz kerek ekenin aıtty, — dedi reıs jolaýshysy.
Onyń aıtýynsha, olardyń otbasylyq demalysy reıs saldarynan buzylǵan. Ushaq Antalııaǵa oralǵannan keıin "Eır Astananyń" áreketine kóńili tolmaǵan. Jolaýshylar júgin bir saǵat kútip, kedennen áreń ótken.
Jolaýshy olardy tańǵy 8-den bastap eshkim tamaqtandyrmaǵanyn, biraq keıinirek olar qonaqúıge kirgenin, bul da kóp ýaqytty alǵanyn aıtady. Alaıda túngi 12-de olar qaıtadan áýejaıǵa kelgen.
- Bizdi qabyldaý bólimsheleriniń arasynda sendeltip qoıdy. Sonyń kesirinen úsh saǵat kassada turyp, úsh balammen kezek bizge jetkende stıýardessalar kelip, bizden buryn tirkeýden ótti, – deıdi Álııa.
Túngi saǵat úshte jolaýshylar reıstiń keshigetini týraly resmı aqparat almaǵan. Jolaýshy áýejaıda avıakompanııa ókilderi bolmaǵanyn aıtady.
Aıtýynsha, olarǵa tamaq, sýsyndar berilmegen. Ásirese balalar sharshady.
Aqyry tańǵy beste jolaýshylar Astanaǵa ushyp, Qazaqstan ýaqyty boıynsha túski 12-de qonypty.
Jaǵdaıǵa qatysty áhirge "Eır Astana" áýe kompanııasy túsinikteme bermedi.
