Tóralqa quramyna memleket jáne qoǵam qaıratkeri, professor Dúısen Qaseıinov, Premer-mınıstr keńesshisi Eraly Toǵjanov, Májilis depýtaty, Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov, Májilis depýtaty, Halyqaralyq ister, qorǵanys jáne qaýipsizdik komıtetiniń tóraǵasy Aıgúl Quspan, Senat depýtaty, Halyqaralyq qatynastar, qorǵanys jáne qaýipsizdik komıtetiniń hatshysy Darhan Qydyráli, qoǵam qaıratkeri Jandarbek Kákishev, Saýda jáne ıntegrasııa vıse-mınıstri Qaırat Tórebaev, Aýyl sharýashylyǵy vıse-mınıstri Erbol Tasjúrekov, «Qazaqstan-Azııa saýda jáne mádenıetti damytý qaýymdastyǵy» basqarma tóraǵasy Qanat Beısek kirip otyr.
Jıynda tóralqa tóraǵasy men hatshysy saılandy. Qaýymdastyq jarǵysyna sáıkes, tóraǵa – konsýltasııalyq-keńesshi organnyń qyzmetine basshylyq jasaıdy. Al tóralqa hatshysy konsýltatıvtik-keńesshi organnyń qyzmetin uıymdastyrýdy, aqparattyq jáne tehnıkalyq qamtamasyz etýdi júzege asyrady. Tóralqa múshesi Eraly Toǵjanovtyń usynysymen tóraǵalyqqa Dúısen Qaseıinov, sondaı-aq tóraǵa usynysymen tóralqa hatshylyǵyna Qanat Toqabaev saılandy.
Kún tártibine saı, otyrysta qaýymdastyqtyń maqsat-mindetin aıqyndaıtyn strategııalyq tujyrymdama talqylanyp, qoldaý tapty. Osy másele boıynsha baıandama jasaǵan basqarma tóraǵasy Qanat Beısektiń aıtýynsha, qaýymdastyq buǵan deıingi «Qazaqstan-Qytaı saýdaǵa járdemdesý qaýymdastyǵynyń» tájirıbesin eskere otyryp, aýqymyn keńeıtý baǵytynda qurylǵan. Ol birinshi kezekte bıznes pen mádenıet salasynyń memlekettik baǵdarlamalardan bastap, jeke ujymdyq bastamalardy, Azııa elderindegi múddesin qorǵaýdy júzege asyrady.
«Qazaqstan-Azııa saýda jáne mádenıetti damytý qaýymdastyǵy» halyqaralyq deńgeıde el ımıdjin arttyratyn aýqymdy is-sharalar ótkizýdi de qoldaıdy.
Talqylaý barysynda tóralqa múshesi Darhan Qydyráli qaýymdastyqtyń strategııalyq tujyrymdamasyna qatysty pikirin bildirdi. «Saýda jáne mádenıetti qatar alyp júrý sheshimi óte durys. Sebebi kezinde Ulyq ulys Altyn ordanyń da, Ortalyq Azııanyń basqa da iri memleketterdiń de ydyraýyna Jibek jolynyń úzilýi aıtarlyqtaı áser etti. Shyǵystan Batysqa sozylyp jatqan kerýen joldarynyń, barys-kelistiń toqtaýy – alpaýyt memleketterdiń mádenı damýyn da, ekonomıkasyn da, saıası júristerin de toqyraýǵa ushyratty. Qazir Memleket basshysy halyqaralyq deńgeıde saýda ıntegrasııasyna, Azııa elderimen jaqyn baılanystarǵa basa nazar aýdaryp otyr. Parlament Senatynda osy Azııa baǵyty boıynsha birneshe zańnama talqylanyp, maquldanyp Prezıdenttiń qol qoıýyna joldandy», dedi senator. Sonymen qatar ol qaýymdastyq atqaratyn is-sharalar josparynyń aýqymy da aldaǵy ýaqytta keńeıe berýge tıis ekenin atap ótti.
Al Tóralqa múshesi Eraly Toǵjanov: «Jańa tehnologııalardyń qarqyndy damý úderisine kýá bolyp otyrmyz. Sonyń biri – jasandy ıntellekt. Munyń ıgiligin bızneske de, mádenıetke de paıdalana almasaq – utylamyz. Osyny eskersek», dedi.
Otyrysta qaýymdastyqtyń strategııalyq tujyrymdamasy qoldaý tapty. Jıyn barysynda tóralqa tóraǵasy atynan «Qazaqstan-Azııa saýda jáne mádenıetti damytý» qaýymdastyǵynyń tóraǵasyna «Senim gramotasy» tapsyryldy.
