Jeldeı júıtkigen moped júrgizýshileriniń deni jastar. Olardyń basym bóligi jyldam jetkizý qosymshasynda jumys istep, nápaqa tabatyndar. Jeńil kólikterdiń jolyn kes-kestep, jıi tártip buzatyndar da solar. Moped tizgindegenderden júrgizýshi kýáligi talap etilmeıtindikten, erejeni elemegender túrli jantúrshigerlik oqıǵaǵa tap bolyp jatyr. Byltyr shaharda mopedterdiń qatysýymen bolǵan jazataıym oqıǵalardyń saldarynan taǵy 16 adam ajal qushqan.
«Taldaý nátıjesi kórsetkendeı, jaraqat alýmen aıaqtalatyn jol-kólik oqıǵalarynyń 16,1 paıyzy mopedter men skýter júrgizýshileriniń kinásinen bolady. Kóp jaǵdaıda kólik júrgizýshileri olardy baıqamaı qalady. Sonymen qatar moped júrgizýshileriniń kóbi qarapaıym jol qozǵalysy erejelerin bilmeıdi. Kúni búgin Almatyda jol-kólik oqıǵalarynyń aldyn alýǵa baǵyttalǵan «Quqyqtyq tártip» jalpyrespýblıkalyq is-sharasynyń úshinshi kezeńi júrip jatyr. 100-ge jýyq ata-ana balalaryna samokat pen moped júrgizýge ruqsat bergeni úshin jaýapkershilikke tartyldy. Bul jalpy zań men qaýipsizdik talaptaryna qaıshy keledi. Keń aýqymdy reıdter kezinde myńnan asa moped, sondaı-aq 3 625 avtokólik mamandandyrylǵan aıyppul turaǵyna ornalastyryldy», deıdi Almaty qalalyq PD jergilikti polısııa qyzmeti basqarmasynyń basshysy Serik Shýmaev.
Qalalyq polısııa departamentiniń málimetinshe, ótken demalys kúnderi megapolıs joldarynda 2 myńǵa jýyq quqyq buzýshylyq anyqtalǵan. Onyń basym bóligin elektrsamokat pen moped tizgindegender jasaǵan. Jalpy, samokattar men mopedterdi paıdalaný boıynsha quqyq buzýshylyqtardy anyqtaýǵa qatysty jergilikti is-shara bastalǵaly, 4 800 moped júrgizýshisi jáne 5 200 samokat júrgizýshisi ákimshilik jaýapkershilikke tartylǵan.
Ekologııalyq turǵydan taza qatynas quraly sanalatyn elektr samokattardyń aıasy keńeıe beretini anyq. Degenmen olardyń qatysýymen bolatyn oqıǵalar da jıilegen. Elektrsamokatyn tizgindegenderden qujat talap etilmeıtini bylaı tursyn, jol erejesine qatysty emtıhan da alynbaıdy. Oǵan qatysty jol erejeleri de zańnamalarda naqty aıqyndalmaǵan. Mamandar qos dóńgelek tizgindegen azamattardy jol qozǵalysy kezinde muqııat bolyp, birqatar erejeni qatań saqtaýǵa shaqyrdy.
«Adam men kólik sany kóbeıgen megapolısterde mopedterdiń keń qoldanysqa ıe bolýy zańdy qubylys. Degenmen osy bastan tártipti kúsheıtken abzal. Jelide júrgizilgen áleýmettik saýaldamada «Almaty ekinshi Mýmbaıǵa aınalyp bara ma?» degen másele kóterilipti. Rasymen solaı, mopedter men motosıklder sany kún saıyn artyp keledi. Kóbi kúnkóris qamymen júr, sondyqtan olarǵa shekteý qoıý múmkin emes. Alaıda moped tizgindegen jastarymyz ómir ózine kerek ekenin umytpaýǵa tıis, ózgeniń de ómirine qurmetpen qaraǵany jón. Kúńgirt tústi kıim kıgen samokatshylar jolda jıi baıqalmaı qalady. Bul olardyń ózderi úshin de asa qaýipti. Jolǵa shyǵar kezde ashyq tústi kıim tańdap, jaryqqa shaǵylysatyn keýdeshe kıgen durys. Sonymen qatar basqa shlem kıip, kóriniske kedergi keltiretin eshteńe taqpaǵan abzal», deıdi qoǵam belsendisi Symbat Baıjóken.
Polısııa basqarmasy motokólik pen samokat paıdalanýshylaryna jan-jaqty túsindirý jumystaryn júrgizýdi kúsheıtken. Reıdtik is-sharalardyń maqsaty – mopedter men samokattardyń júrýine tyıym salý emes, olardyń jeke jaýapkershiligin eske salyp, kólik júrgizý mádenıetin úıretý. Jaz aılarynda eldiń eń iri shaharynda kóbeıe túsetin mıkromobıl júrgizýshileri osy jaılardy jadynda ustasa ıgi.
ALMATY
