Foto: unsplash.com
Dárigerdiń aıtýynsha, birinshiden, basseınderdiń jaǵasynda jalań aıaq júrý, qoǵamdyq dýshqa túsý, saýna sııaqty ylǵaldy jerlerde sańyraýqulaq ınfeksııasyn juqtyryp alý óte ońaı. Sondyqtan mundaı qoǵamdyq oryndarda mindetti túrde arnaıy aıaq kıim kıip júrý qajet.
Ekinshiden, jaz aıynda sıtrýs komponentteri bar kremderdi qoldaný teriniń buzylýyna alyp keledi. Dermatolog jaz mezgilinde mundaı kremderden aýlaq bolýdy usyndy.
«Sıtrýstyń kúnmen árekettesýi teriniń kúıip qalýyna jáne gıperpıgmentasııaǵa ákeledi. Ol birneshe aıǵa terińizde qalyp qoıýy múmkin», dedi ol.
Úshinshiden, denesinde súıel nemese papıllomasy bar adamdarǵa qyryný óte qaýipti.
«Súıelder men papıllomalar - juqpaly. Eger siz olardyń bireýin qyryný kezinde zaqymdasańyz, vırýs búkil aıaq-qolǵa taralýy múmkin. Ásirese súıelder óte maıda jáne kóp bolsa, olardan qutylý soǵurlym qıyn bolady», deıdi dermatolog.
Maman kópshiliktiń jazda jiberetin taǵy bir qateligin atady. Ol − shashty jýǵannan keıin dymqyl baspen uıyqtaý.
«Ylǵal shash − bakterııalar men sańyraýqulaqtardyń kóbeıýine óte qolaıly ylǵaldy orta, bul saqına nemese seboreıalyq dermatıt sııaqty aýrýlarǵa ákeledi», dep qorytyndylady dáriger.
