Sýretti túsirgen – Erlan OMAR, «EQ»
Kez kelgen paıdaly eńbek bara-bara bireýden bireý alyp ulttyq kitapqa aınalatynyn ejiktep aıtyp jatpaımyz. Sondyqtan Qazaqstan Úkimetiniń qaýlysyna sáıkes elimizde jańa mereke – Ulttyq kitap kúni jyl saıyn 23 sáýirde atalyp ótiletini ıgi bastama ǵana emes, bolashaqqa biregeı qadam. Prezıdent Qasym-Jomart Toqaev Ulttyq quryltaıdyń úshinshi otyrysynda kótergen másele kóp keshikpeı qoǵam tarapynan qoldaý taýyp otyr. Memleket basshysy kitap oqýdyń joǵary mádenıetin qalyptastyrýdy tapsyrǵan bolatyn. Biregeı bastamany qoǵam jyly qabyldaǵany bilim men ǵylymǵa betburys baryn bildirse kerek. Túsine bilgenge, halyqty ádebıet álemine moıyn burýǵa, kitap kókjıegine kóz jiberýine úndeý, úgitteý amaly nemese ısharasy desek bolady.
Atalǵan joba buǵan deıin Týrızm jáne sport mınıstrliginiń bastamasymen Ashyq NQA saıtynda jarııalanǵan. «Joba qoǵamda kitap oqýdyń joǵary mádenıetin qalyptastyrý maqsatynda 23 sáýir – Ulttyq kitap kúni merekesin merekelik kúnder tizimine engizý maqsatynda ázirlengen» delingen qaýly jobasynda. 22 mamyrǵa deıin qoǵam talqysyna usynylǵan qaýly 2024 jylǵy 16 shildede kúshine enetinin atap ótken jón.
Memleket basshysynyń Ulttyq kitap kúnin belgileý týraly tapsyrmasyna baılanysty elimizde kúntizbege jańa mereke qosylǵanyna keshe Mádenıet jáne aqparat mınıstri Aıda Balaeva jeke paraqshasynda ún qosty.
«Prezıdent óz sózinde: «Shyn máninde, ozyq oıly ult bolýdyń eń tóte joly – kitap oqý. Sondyqtan kitap oqý mádenıetin qoǵamda barynsha ornyqtyrýymyz kerek», dep atap ótti. Qoǵamda kitap oqý mádenıetin qalyptastyrý boıynsha mınıstrlik tarapynan júıeli jumystar jalǵasa beredi. Osy oraıda Mádenıet jáne aqparat mınıstrligi Ulttyq kitap kúnine oraı úzdik kitaptarǵa arnalǵan «Ulttyq kitap» baıqaýyn jarııalady. Baıqaýda «Balalarǵa arnalǵan úzdik kitap», «Jasóspirimderge arnalǵan úzdik komıks kitaby», «Non fıkshn (psıhologııalyq, motıvasııalyq, bıznes) baǵytyndaǵy úzdik kitap», «Detektıv janryndaǵy úzdik kitap», «Satıra janryndaǵy úzdik kitap», «Úzdik ılıýstrasııalyq kitap», «Úzdik aýdarma kitaby», «Eń kóp oqylǵan kitap», «Fentezı janryndaǵy úzdik kitap», «Úzdik baspa» atalymdary boıynsha jeńimpazdar anyqtalady. Sondaı-aq «Jyl kitabyna» gran-prı syılyǵy tabystalady. Bul baıqaý úzdik kitaptardy anyqtap, ony kópshilikke nasıhattaýǵa, qoǵamdy kitap oqýǵa úndeýge yqpal etedi degen oıdamyz», dedi A.Balaeva.
Shyn máninde, qoǵamymyzdyń rýhanı-mádenı turǵydaǵy suranysyna laıyqty jaýap berý isinde ult ádebıetiniń baı qoryna júginý talas týdyrmaýy kerek. Osy baǵyttaǵy jumystarǵa memleket tarapynan oń qabaq tanytý úrdisi baıqalǵan eken, ony óz deńgeıinde oryndaýda jaıbaraqattyq, nemquraıdylyq oryn almaýǵa tıis. Bul degenimiz ózimizdiń qunarly da baı ádebıetimizdi tıimdi paıdalana bilýge shaqyrady.
«Álem boıynsha kitapqa baılanysty halyqaralyq jobalar kóp. «Bir el – bir kitap», dúnıejúzilik Kitap jáne avtorlyq quqyq kúni, Balalar kitaby kúni degendeı. Bul kúnniń ereksheligi – Ulttyq kitap kúni. Tamyrymyzǵa oralýmen sıpattalady. Ana tilimizdegi ulttyq tanymmen sýarylǵan kitaptardyń nasıhattalýyna, ol shyǵarma avtorlarynyń bedeli artýyna úlken qozǵaý salatyn ataýly data dese bolady. Ekinshiden, memlekettiń ártarapty damýynyń ózi onyń rýhanı kórsetkishine baılanysty. Qoǵam rýhanı turǵydan jetilgen saıyn basqa salalar da alǵa basady. Sondyqtan Prezıdent bul tapsyrmany memleket damýynyń strategııasy qaralatyn Ulttyq quryltaıda ortaǵa tastaýy tegin emes. Mundaı jıyndarda kitap, kitaphana, balalar ádebıeti, avtorlarǵa mańyz berip, arnaıy kún belgilenýi – barlyǵymyz mán beretin ýaqyt keldi degen sóz. Qazir kitaphanada oqý mádenıetin qalyptastyrýdyń jas erekshelikterine baılanysty jańa formattardy qolǵa alyp jatyrmyz. Sońǵy kezde kitaphana ishinde ǵana emes, kez kelgen jerde kitap oqýǵa múmkindik týdyrýdy kózdep, «Air Astana» áýe kompanııasymen bir jobany qolǵa alyp, bitirýge az qaldyq. Borttaǵy medıaqurylǵylarǵa ulttyq ádebıetimizdiń jaýharlaryn aýdıokitap retinde júktep shyǵamyz. Budan da basqa jobalar bar», deıdi Ulttyq akademııalyq kitaphananyń dırektory Ǵazıza Qudaıbergenqyzy.
Osyndaı jobalar – túsine bilgenge olqylyqtardyń ornyn toltyrýǵa jasalǵan oń qadamdar. Al biz sóz etip otyrǵan Ulttyq kitap kúni atty mereke oń qadamdarǵa betburys qana emes, jandandyrýshy, baıypty bastama dep tanyǵymyz keledi. Endeshe, Ulttyq kitap kúnin halqymyzdyń aıtýly kúnderiniń birine aınaldyrý óz qolymyzda, aǵaıyn. Osynaý kún shyn máninde ultymyzdyń uly merekesine aınalyp jatsa, bul bizdiń utqanymyzdy, halyq retinde órkenıet tórine shyqqanymyzdy bildiredi. О́z ádebıetimizdiń altyn qoryndaǵy tamasha shyǵarmalardan halqymyz rýhanı nár alsa, qazaqtyń keleshegi kemel bolatynyn uǵyna bileıik.
