1922 jyly 6 shildede Aqtóbe oblysy Shalqar aýdanynda dúnıege kelgen Izgilik Nurmaǵambetuly – búkil ómirin Otanǵa qyzmet etýge arnaǵan adam. Áskerı bilimi oǵan maıdanda vzvod komandıri bolýǵa múmkindik berdi. Erligi men batyldyǵynyń arqasynda maıor ataǵyn aldy. Jaýyngerlik ómirbaıany 1941 jyly 24 sáýirde Aqtóbe aýdandyq áskerı komıssarıaty shaqyrǵan kezden bastalady. 1941 jyldyń maýsymynan 1945 jyldyń 28 sáýirine deıin ol 101-atqyshtar brıgadasynyń quramynda batalon komandıriniń orynbasary qyzmetin atqardy. Máskeýden Berlınge deıingi uzaq ta aýyr joldy júrip ótti. 4-tank armııasynyń quramynda Orel-Kýrsk doǵasyndaǵy shaıqasqa qatysyp, Kalının, Brıansk, Belarýs jáne 1-Ýkraın maıdandarynda shaıqasty. Maıdan dalasynda eki ret jaralanyp, kontýzııa aldy.
Maıdanger II dárejeli «Otan soǵysy» ordenimen, «Germanııany jeńgeni úshin», «Berlındi alǵany úshin», «Jaýyngerlik eńbegi úshin» medaldarymen, Mınsk pen Smolenskini azat etkeni, Kýrsk doǵasyndaǵy shaıqasqa qatysqany úshin jáne basqa da kóptegen nagradamen marapattalǵan.
Izgilik Dabaev áskerı qyzmetshilerge Rjev mańyndaǵy shaıqastar týraly aıtty. «14 aıǵa sozylǵan urysta rotamdaǵy 200 jaýyngerden 25 adam ǵana aman qaldy», dep eske aldy ardager. Onyń kóz aldynda batalon komıssary Tólegen Álshimbaev pen brıgada komandıriniń orynbasary Jarmuhambet Meıirmanov erlikpen qaza tapty.
Soǵystan keıin Izgilik Dabaev jýrnalıstıkamen aınalysyp, KSRO Jýrnalıster odaǵynyń múshesi boldy. Qazaq KSR Joǵarǵy Keńesiniń marapattaý bólimin basqardy.
«HH ǵasyrdaǵy kórnekti qaıratkerlerdiń portretteri» kitabynda Álibı Jangeldın, Ábilhan Qasteev, Jambyl Jabaev, Ahmet Jubanov, Jumabaı Shaıahmetov jáne Kemel Toqaev týraly estelikteri jarııalanǵan.
Búginde maıdanger jasyna qaramastan belsendi. Aqsaqal úsh ul, bir qyz tárbıelep ósirdi. Izgilik Nurmaǵambetuly áskerı qyzmetshilermen uzaq ómir súrý syrymen bólisti. Olardy tártipti qatań saqtap, durys tamaqtanyp, jaman ádetterden aýlaq bolýǵa shaqyrdy. Soǵys ardageriniń erlik pen tózimdilikke toly ǵumyry jas urpaqqa úlgi bolyp qala bermek.
