Uzyn jetegi bar qurylǵyǵa par at jegip, shóp shabady, tyrnaýyshqa taǵy bir at jegip, shabylǵan shópti jınaıdy, sosyn keshkilik kópendep qolmen úıetin. Kún qaıta attardy shiderlep jiberedi de, tań ata ustap ákelip, taǵy jumysqa jegedi. Keıde túndeletip qostyń ústine aýyldyń kóp jylqysy kelip jaıylady da, attar tusamys-shiderin úzip, kóp jylqyǵa ilesip ketedi. Bir at únemi arqandaýly turady. Álgige mine sala jónelgen aǵataıym kóp jylqynyń ishine kirip, attardy shalma tastap ustaıtyn. Shalma tastaý maǵan úırenshikti kórinetin. Keıin bilsem, at ústinde buǵalyq salý, shalma tastaý degen kádimgideı óner eken. Sol kezdiń ózinde eki jylqyshynyń biri shalma tastaı almaıtyn, qazir tipti sırek shyǵar. Qolyndaǵy arqandy shıyrshyqtap alyp, 5-7 metrden kózdegen jylqysyna laqtyryp qalǵanda, sart etip basyna kıilip, qyl moıynnan tuzaqtap alady. Al endi shalmany jaıylyp bos júrgen jylqy turmaq, 7-8 metrden qaǵýly qazyqqa túsirýdiń ózi qıyn.
Keıin osy shalma tastaýǵa qatysty bir áńgime estidim. Jańaarqa jaǵynda Kóktińkóli degen aýylda 96 jasqa kelip qaıtqan Ahmetjan atty aqsaqal ótipti. Jylqyshy, ánshi, dombyrashy, naǵyz dalanyń qazaǵy desetin. 96 jasqa qaraǵan shaǵynda kóktemde jylqy kelgende, Býyrly atyna shalma tastasa onysy jaltaryp, tastaǵan shalmasy tuńǵysh ret túspeı qalsa kerek. О́mir boıy jylqy baqqan aqsaqal sonda: «Ahmetjannyń osy ólgeni ólgen eken» – dep teris aınalyp ketipti. Bir qys qana minbeı qoıa bergen Býrylyna shalmasy túspegen jylqyshy úıine baryp jatyp qalypty. Kózi kórgender «Ahmetjan shalmany eki tastamaıtyn» dep daǵdarypty. Kóp uzamaı jylqyshynyń ózi de dúnıe salypty.
Qazaqta shalma tastaý – úlken óner. Ulttyq oıyn túri. Oıynǵa qatysýshylar alań tańdap, on metr jerge qazyq qaǵady. Uzyn arqan alyp, bir jaǵyn ilmektep, shalma jasaıdy. Jınalǵandar kezektesip álgi qaǵylǵan qazyqqa shalma tastaıdy. Oıynshy arqannyń bir ushyn sol qolyna ustaıdy da, ekinshi shalma jaǵyn oń qolynyń shyntaǵyna orap, sheńberlep alady da qazyqqa ne tomarly butaqqa laqtyrady. Shalmany nysanaǵa kim kóp túsirse, sol jeńedi.
