Alqaptyń jartysy joıylǵany – rasynda da qýanyshty jańalyq. Biraq munymen is bitti me, esirtki ósirýge daǵdylanǵandardyń qarasy sıredi me?
Oblys aýmaǵyndaǵy qarasora alqaby azaıǵanymen, esti alatyn esirtkige ańsary aýǵandar azaımaı turǵan sekildi. Oǵan «Qarasora-2024» naýqany kezinde taǵy da kóz jetkizgendeı boldyq. Merkilik azamat iri kólemde keptirilgen jáne keptirilmegen marıhýana jınaǵany úshin ustaldy.
Jalpy, jabaıy qarasoramen kúresý úshin jyl saıyn aldyn alý is-sharasy ótkiziledi. Bir sózben aıtqanda, esirtkige esi ketkenderdiń aıylyn jıdyrý úshin quzyrly organdar tarapynan aýyz toltyryp aıtarlyqtaı jumys atqarylyp jatyr. Alaıda soǵan qaramastan iri mólsherde esirtki jınaǵandar jyl saıyn ustalyp jatady. Olardyń qatarynda esirtkini bızneske aınaldyrǵandar da barshylyq.
Oblystyq polısııa departamentiniń baspasóz qyzmeti keltirgen derekke júginsek, 42 jastaǵy merkilik azamatty polıseıler «Qarasora-2024» naýqandyq is-sharasy kezinde qolǵa túsirgen. Sot-hımııalyq saraptamanyń qorytyndysyna sáıkes Merki aýdanynyń azamatynan 39,7 kılogramm keptirilgen jáne 22 kılogramm keptirilmegen marıhýana tárkilengen. Qyryqtyń qyrqasyna shyqqan azamat óz kinásin tolyqtaı moıyndaǵan.
«Kúdikti qas qaraıǵan shaqta qolǵa tústi. Shyntýaıtyna kelsek, esirtki satýmen aınalysatyndar tún qatyp jumys isteıtini belgili. Munyń bárin jetik bilgendikten, biz ilki sátke de damyl tappaı, toqtaýsyz jumys istep jatyrmyz. Ásirese jabaıy qarasora qaýlap ósken kezeńde jumysty toqtatýǵa qaqymyz joq. Kúdikti azamatqa qatysty asa iri mólsherde esirtki zattaryn zańsyz saqtaǵany úshin sotqa deıingi tergeý amaldary bastaldy», deıdi oblystyq polısııa departamenti esirtki qylmysyna qarsy is-qımyl basqarmasynyń basshysy Álim Bajyqbaev.
Oblystyq polısııa departamentiniń baspasóz qyzmeti keltirgen derekke sensek, óz kinásin tolyq moıyndaǵan kúdikti ýaqytsha ustaý ızolıatoryna qamaqqa alynǵan. Ol buryn da esirtki qylmysymen quryqtalyp, isti bolǵan eken.
Ilgeride polısııa qyzmetkerleri 35 jyl boıy baıyrǵy kartamen jumys istep kelgeni málim. Erterektegi derek boıynsha, jabaıy qarasora ósiriletin alqap 138 myń gektardan asyp jyǵylatyn. Jaqynda ǵana jasalǵan jańa karta alqaptyń eki esege azaıǵanyn aıqyndap berdi. Endi esirtki ósirýshilermen kúres polısııa qyzmetkerleri úshin burynǵydaı qıyn bola qoımas.
Jambyl oblysy
