Foto: Aqorda
Mınıstr qujat jobasy qoldanystaǵy erejelermen salystyrǵanda asa ózgermegenin alǵa tartty.
«Akkredıtteýden bas tartý negizderi týraly erejelerge toqtalsaq. Bul BAQ-tyń jumys isteýin ýaqytsha toqtatý nemese múldem jabý jáne resmı reestrde tirkelmegeni týraly sot sheshimi kúshine engen jaǵdaıda iske asady», dep jazdy Aıda Balaeva.
Budan bólek, ol jýrnalıster arasynda eń kóp suraq týdyrǵan erejeniń 10-tarmaǵyna, atap aıtqanda, BAQ ókilderiniń qandaı talaptardy saqtaýy kerek ekenin tarqatyp jazdy.
«Birinshiden, kez-kelgen jýrnalıst qaı BAQ atynan akkredıtasııadan ótse, sol redaksııaǵa ǵana aqparatty jınap, jarııalaı alady. Alaıda jýrnalıstke birden birneshe BAQ atynan akkredıtasııa alýǵa eshkim tyıym salmaıdy.
Ekinshiden, bul talap belgili bir oqıǵaǵa/is-sharaǵa qatysty jýrnalısterdiń jeke pikirleri men ustanymdaryn áleýmettik jelilerdegi jeke akkaýnttarynda bildirýge qatysy joq.
Úshinshiden, reglament máselesine keletin bolsaq, qoldanystaǵy erejelerde qazirdiń ózinde is-sharaǵa qatysýshylardyń taqyrypty, ýaqyt tártibin, qoǵamdyq tártipti saqtaýyn júrgizýshi (ıaǵnı, is-shara moderatory) qamtamasyz etetini qarastyrylǵan. AQSh pen Eýropalyq Odaqtyń jáne halyqaralyq uıymdardyń halyqaralyq tájirıbesi kórsetkendeı, belgilengen erejelerdi, sondaı-aq zańnamany buzǵan jaǵdaıda jýrnalıst is-sharalarǵa qatysý quqyǵynan jáne akkredıtasııadan aıyrylady. Mysaly, Eýroparlamenttegi BAQ qyzmetin retteıtin erejede túsirilimge ruqsat etilgen arnaıy oryndar qatań túrde belgilengen.
Tórtinshiden, erejede árbir memlekettik organnyń nemese uıymnyń belgili bir is-sharanyń reglamentin ózi bekitetindigi kórsetilgen. Bul rette mınıstrlik ýákiletti organ retinde aqparatqa qoljetimdilik qaǵıdattaryn jáne jýrnalısterdiń erekshe mártebesin saqtaý máseleleri boıynsha atalǵan reglamentti ázirleý boıynsha tıisti usynystaryn jiberetin bolady.
Besinshiden, erekshe mańyzdy memlekettik obektilerge kirý jáne sol mekemelerdegi rejımderdi ustaný da qoldanystaǵy zańnamany saqtaý men qaýipsizdiktiń aınymas bóligi bolyp tabylady», dep jazdy Mádenıet jáne aqparat mınıstri.
Sonymen qatar Aıda Balaeva aqparatqa qoljetimdilikti qamtamasyz etý men jýrnalısterdiń mártebesin arttyrý árqashan mınıstrlik qyzmetiniń basty basymdyǵy ekenin atap ótti.
