Asqar da kezinde aqańdy ókpelete qoımaǵandardyń biri edi... Al qazir tatyp almaıdy. Onyń araqtan bezinýi de basqalardan bóleksheleý.
– Keshege deıin úırenip qalǵan aqańdy burqyratpasam, júre almaıtyn edim. «Kelin tússe, qoıarmyn» deıtinmin. Biraq ishkiń kelgende kelin de kedergi bola almaıdy eken. Nemereli bolǵanda da bir aı boıy úzbesten «jýdyq». Solaı jalǵasyp jatqan.
Nemere de ósti. Til shyǵa bastady. О́zi maǵan sondaı jaqyn. Áke-sheshesine de, tipti ájesine de barmaıdy, tek meni izdeıdi de turady. Jumystan qalaı kelemin, qasymnan shyqpaıdy.
Birde Qudaı atyp, úıge taǵy da «burqyratyp» kelmeımin be? Nemerem aldymnan júgirip shyqty. Ádettegideı qushaǵyma basyp, betinen súıeıin desem, ol basyn shaıqap, súıgizbeıdi. «Áı, saǵan ne boldy?» desem, «Ata, kákáı, ata kákáı» dep, menen qashqaqtap, jýymaıdy. Iship alǵanymdy jaqtyrmaǵanyn túsindim. Sodan túnimen uıyqtaǵanym joq. «Bala-ekesh balaǵa da qadirim qalmaı barady eken, budan keıin araq degen páleni aýzyma almaıyn» dep óz-ózime sert berdim. Sóıtip, sol kúnnen bastap araqty tastadym da kettim», deıdi Asqardyń ózi.
Onyń báıbishesi de máz-meıram. «Nemere degen qudiret eken ǵoı. Mynaǵan «araǵyńdy tasta» dep aqyl aıtpaǵan adam, «endi iship kelseń, jumystan statıamen shyǵasyń» dep eskertpegen bastyq qalmaǵan shyǵar. Biraq sonyń eshqaısysy da áser etpep edi. Al nemeresiniń biraýyz sózi sonyń bárinen de qýatty bolyp shyqty. Osydan soń «nemere degen qudiret eken ǵoı» demegende qaıteıin?!» degen ol «bizge osyndaı nemere syılaǵan kelinimnen aınaldym» degendi qosa aıtýdy da esh umytpaıdy.
Ulytaý oblysy
