Kásipker kelinshek 2016 jyldan beri kebis-másini oıýlap, túrli taspen áshekeılep tigip, satylymǵa shyǵara bastaǵan. Buǵan deıin mundaı aıaqkıimder otandyq naryqta bolmaǵan. Alǵash dep aıtý sebebimiz de sol.
«Sol jyly úshinshi balammen dekrettik demalysta otyrǵan kezimde «Qandaı jumyspen aınalyssam eken?» dep oılandym. Joldasymnyń jalaqysy kúnkóriske jete qoımaıtyny anyq. Sóıtip júrgenimde Instagram jelisinen О́zbekstandaǵy jármeńkede áshekeıli kebisterdiń turǵanyn kórip, «Osylardy nege ózimizde tikpeske?» degen oı keldi. Oǵan úlken qarjynyń da qajeti joq edi. Kóp uzamaı balanyń jasqa tolǵanǵa deıin túsip turatyn járdemaqysynyń 20 myń teńgesine bazardan 3 kebis satyp aldym. Onyń syrtyn oıýlap, áshekeılep tigip, daıyn ónimdi óz Instagram paraqshama jarııalap, tapsyrys qabyldaıtynymdy habarladym. Odan keıin másilerdi de bazardan satyp alyp kelip, syrtyn dál solaı sándep sata bastadym», deıdi.
Rahıma tiginshilik, dızaınerlik ónerdi esh jerden meńgermepti. Bul kásipti bastar sátte óz túısigine ǵana senim artqan.
«Áýlette atam etikshi bolǵan. Mundaı ismerlik sol kisiden darýy ábden múmkin. Búginde másini arnaýly seh arqyly tek bylǵarydan tiktiremiz. Qazir osy ónimniń jazda kıetin júnsiz túri, qysta kıetin qoı júnimen jáne jasandy júnmen astarlanǵan túrleri bar. Sondaı-aq qonyshy uzyn jáne qysqa, tabany shegelengen jáne jumsaq degen sııaqty birneshe túri bar. Sapasyna qaraı baǵasy da ártúrli. Al syrtyna ádemi tasyn, oıýyn qoıyp, jubaıym ekeýmiz úıden sándeımiz. Eń alǵashynda bir kúnde bir másini áýre etetinbiz. Qazir bir saǵatta tigetin boldyq. Qolymyz ábden jattyqqan», deıdi Rahıma.
Otbasylyq kásip arqyly tigin ónerin qosymsha tabys kózine aınaldyrǵan erli-zaıypty «Qurym masi» brendin jan-jaqqa tanytyp otyr. Aıta ketetin bir jaıt, keıipkerimiz kásibin keń kólemde damytý úshin memleketten qarjylaı qoldaý almapty.
«Jaz mezgilinde mási kóp suranysqa ıe emes, sondyqtan kúnine 1-2 dana ǵana tigemiz. Aıyna 300 myńdaı paıda túsedi. Tapsyrys kóp túsetin ýaqyt – kúz ben qystyń alǵashqy aılary. Ol ýaqytta kúnine 10 másiden kóp tigemiz. Eń arzany – jazdyq másiler. Kebissiz, qarapaıym túri – 12 myń, al kebisimen, oıýlanǵan túri – 18 myń teńge. Eń qymbaty – qoıdyń júnimen astarlanǵan jáne tabany shegelengen túri. Negizinen jurt ony jeltoqsanda, Jańa jylda úıdegi úlkenderine syılyq retinde alady. Sodan soń 8 naýryz, Kórisý, Naýryz merekeleri qarsańynda jaqsy ótedi. Mundaı ýaqytta aıyna 2-3 mıllıon teńge taza paıda túsirýge bolady. Al kebis-másiniń dızaıny tutynýshy suranysyna baılanysty tigiledi», deıdi sheber kelinshek.
Ulttyq naqyshtaǵy aıaqkıimge tapsyrys eldiń ár óńirinen túsedi. Tipti shetelden, mysaly, AQSh, Qytaı, Reseıge alyp ketken otandastarymyz da bolǵan. Sheberdiń kebis-másileri birqatar sán úıiniń saýda núktelerine de qoıylǵan. Olar sheberden óz qunyna alyp, ústinen sál aqy qosyp satatyn kórinedi.
Kásipkerdiń endi bir maqsaty bar, ol – ulttyq naqyshta kebis pen másini sándep tigýden shákirt tárbıeleý. Bar bilgenin úıretem degen Rahıma mundaı ulttyq kásiptiń ár óńirde damýyn shyn qalaıtynyn da aıtyp otyr.
